چاہتے ہیں پارلیمنٹ میں آئین قانون کی پاسداری کیلئے جہدوجہد چلتی رہے

اسلام آباد ( اردوپوائنٹ اخبارتازہ ترین۔ 22 مئی 2024ء) قومی اسمبلی میں اپوزیشن لیڈر عمر ایوب خان نے کہا ہے کہ چاہتے ہیں پارلیمنٹ میں آئین قانون کی پاسداری کیلئے جہدوجہد چلتی رہے،پاکستان میں آئین نام کی کوئی چیز نہیں ہے، جے یوآئی کے ساتھ گفتگو کا سلسلہ جاری رہے گا، پولیس نے آج ہمارے دفتر پر دھاوا بولا، پولیس راؤف حسن کے ملزمان کو گرفتار کرنے کی بجائے بے قصورحماد اظہر کے پیچھے لگی ہوئی ہے۔

تفصیلات کے مطابق سربراہ جے یوآئی ف مولانا فضل الرحمان سے پی ٹی آئی وفد عمر ایوب ، اسد قیصر وہ دیگر نے ان کی رہائشگاہ پر ملاقات کی ، ملاقات کے بعد پی ٹی آئی وفد کے ہمراہ میڈیا سے گفتگو کرتے ہوئے مولانا فضل الرحمان نے کہا کہ ملک کے معاملات پر کوئی شک نہیں کہ آئین پاکستان کی کوئی حیثیت نہیں رہی، پارلیمنٹ کی اہمیت ختم ہوچکی ہے، جمہوریت اپنا مقدمہ ہار رہا ہے، دہشتگردی کے خلاف آپریشن گزشتہ دس پندرہ سالوں سے چلتا آرہا ہے، لیکن مرض بڑھتا گیاجوں جوں دوا کی، اس میں دس گنا اضافہ ہوا ہے،اب یہ کیا حکمت عملی ہے کہ بلند وبانگ دعووں کے باوجود عام آدمی کو امن نہیں فراہم کیا جاسکا، حال میں قبائلی علاقوں میں ڈرون حملے میں عام شہریوں کو شہید کیا گیا، غلطی تسلیم کی گئی، اندھا دھند آپریشن عام آدمی کی زندگی کو غیرمحفوظ بنا دیتا ہے، چمن بارڈر پر چھ سات ماہ سے دھرنا بیٹھا ہوا ہے۔

(جاری ہے)

مقامی آبادی کا روزگار تباہ ہوچکا ہے، متبادل روزگار بھی نہیں دیا جارہا، بے ہنگم شرائط عائد کی جاتی ہے۔ ملک کی صورتحال پر ہمارا فکر مند ہونا فطری ہے۔انہوں نے کہا کہ پارلیمنٹ میں مشترکہ پوائنٹس پر آواز ایک ہونی چاہئے اور ملک میں خوشگوار سیاسی ماحول کی جانب بڑھنا چاہئے، اگر ہم اختلاف ختم نہیں کرسکتے تو اختلافات کو نرم کرسکتے ہیں،ہم چاہتے ہیں سیاسی ماحول میں رابطے بڑھیں تلخیاں کم ہوں، بہتری کی جانب جانے کا سفر ہے ، اسی سلسلے میں پی ٹی آئی کا وفد آیا، ان کو خوش آمدید کہتے ہیں۔

اپوزیشن لیڈر قومی اسمبلی عمر ایوب خان نے کہا کہ مولانا فضل الرحمان اور ان کے ساتھیوں نے کھلے دل کے ساتھ ہمیں خوش آمدید کہا، بطور اپوزیشن لیڈر چاہتا ہوں کہ پارلیمنٹ میں آئین قانون کی پاسداری کیلئے جہدوجہد چلتی رہے، یہی بانی پی ٹی آئی اور ہر محب وطن پاکستانی کی خواہش ہے ۔ آج ہماری اچھی گفتگو ہوئی یہ گفتگو آگے بھی چلتی رہے گی، جے یوآئی ف کا اپنا جلسوں کا سلسلہ چل رہا ہے، اسی طرح تحریک تحفظ آئین پاکستان کا بھی جلسوں کا ایک شیڈول چل رہا ہے، پاکستان میں آئین نام کی کوئی چیز نہیں ہے، پی ٹی آئی کے دفتر میں پریس کانفرنس ہوئی ، حماد اظہر آئے، اس کے بعد پولیس نے ہمارے دفتر پر دھاوا بولا ، پولیس راؤف حسن کے ملزمان کا تعاقب کرنے کی بجائے بے قصورحماد اظہر کے پیچھے لگے ہوئے ہیں، چاہتے ہیں پارلیمنٹ میں آئین قانون کی پاسداری کیلئے جہدوجہد چلتی رہے،پاکستان میں آئین نام کی کوئی چیز نہیں ہے۔