سینیٹ سیکرٹریٹ میں تعینات ڈرائیورز کی ٹریننگ کے حوالہ سے سیشن کا انعقاد

اسلام آباد (اُردو پوائنٹ اخبارتازہ ترین - اے پی پی۔ 22 مئی2024ء) سینٹ سیکرٹریٹ میں تعینات ڈرائیورز کی ٹریننگ کے حوالے سے ایک سیشن کا انعقاد بدھ کو پاکستان انسٹیٹیوٹ آف پارلیمنٹری سروسز میں کیا گیا ۔ سینیٹ سیکرٹریٹ کے مطابق سیشن کا انعقاد سینیٹ سیکرٹریٹ کی ٹرانسپورٹ برانچ کی زیر نگرانی اسلام آباد ٹریفک پولیس کے حکام نے کیا۔ ٹریننگ سیشن میں سینٹ سیکرٹریٹ کے جوائنٹ سیکرٹری جمیل احمد کھوسو ، پاکستان انسٹیٹیوٹ آف پارلیمنٹری سروسز کے ایگزیکٹو ڈائریکٹر محمد انور اور ایس ایس پی ٹریفک پولیس سرفراز ورک نے بطور مہمان خصوصی شرکت کی۔

ٹریننگ سیشن میں سینیٹ سیکرٹریٹ کے ڈرائیورز کو نئے ٹریفک قوانین اور حفاظتی انتظامات کے حوالے سے تفصیلی آگاہ کیا گیا۔ اس موقع پر جوائنٹ سیکرٹری جمیل احمد کھوسو نے اپنے تاثرات کا اظہار کرتے ہوئے کہا کہ محفوظ ڈرائیونگ سڑک پر مال و جان کی حفاظت کے لئے انتہائی اہم ہوتی ہے اور یہ کسی بھی مہذب قوم کے رویوں کی عکاسی کرتا ہے ۔

(جاری ہے)

انہوں نے کہا کہ سینٹ سیکرٹریٹ میں تعینات ڈرائیورز پر محتاط اور محفوظ ڈرائیونگ اس لحاظ سے اور بھی اہم ہو جاتی ہے کہ وہ پاکستان کے ایوان بالا سے تعلق رکھتے ہیں اور سڑک پر ان کا کردار انکے اس ادارے کی بھی عکاسی کرتا ہے۔

انہوں نے کہا کہ یہی وجہ ہے کہ سینیٹ سیکرٹریٹ اپنے ڈرائیورز حضرات کو ٹریفک قوانین سے متعلق آگاہ رکھنے کیلئے باقاعدگی سے ٹریننگ سیشنز کا انعقاد کرتا ہے اور آج کا ٹریننگ سیشن بھی اسی سلسلے کی ایک کڑی ہے۔ ٹریننگ سیشن میں چیف ٹریفک آفیسر سرفراز ورک اور انسٹیٹیوٹ آف پارلیمنٹری سروسز کے ایگزیکٹو ڈائریکٹر نے بھی اپنے اپنے خیالات کا اظہار کیا۔ ٹریننگ سیشن کے اختتام پر چیف ٹریفک آفیسر سرفراز ورک اور دیگر حکام کو جوائنٹ سیکرٹری جمیل احمد کھوسو کی جانب سے اعزازی شیلڈ پیش کی گئیں ۔