کراچی میں چھینے گئے موبائل دوبارہ فروخت کیے جانے کا انکشاف

جمعرات 19 مئی 2022 23:36

کراچی (اُردو پوائنٹ اخبارتازہ ترین - این این آئی۔ 19 مئی2022ء) کراچی میں چوری اور چھینے گئے موبائل آئی ایم ای آئی بدل کر دوبارہ فروخت کیے جانے کا انکشاف ہوا ہے۔ذرائع کے مطابق کراچی کے علاقے لانڈھی میں پولیس نے کارروائی کرتے ہوئے سافٹ ویئر ایکسپرٹ کو گرفتار کرلیا۔پولیس کا کہنا ہے کہ گرفتار ملزم کے قبضے سے چھینے ہوئے موبائل فون برآمد ہوئے ہیں۔

پولیس کے مطابق ملزم سے آئی ایم ای آئی بدلنے والے سافٹ ویئر اور دو لیپ ٹاپ برآمد کرلیے گئے ہیں، ملزم کے خلاف مزید تحقیقات جاری ہیں۔

(جاری ہے)

واضح رہے کہ گزشتہ دنوں پولیس نے اپنی رپورٹ میں کہا تھا کہ شہر میں موبائل فون چھیننے کی وارداتوں میں کمی واقع ہوئی، مارچ میں تمام ڈسٹرکٹس سے 2 ہزار 416 موبائل فون چھینے گئے جبکہ اپریل میں یہ تعداد 2 ہزار 118 رہی۔

پولیس کا رپورٹ میں کہنا تھا کہ مارچ میں 206 جبکہ اپریل میں 183 کاریں چوری ہوئیں، مارچ میں 408 اور اپریل میں 346 موٹر سائیکلیں چھینی گئی۔مجموعی طور پر مارچ میں 7 ہزار 316 شہریوں سے چھینا جھپٹی ہوئی جبکہ اپریل میں لٹنے والے شہریوں کی تعداد 6 ہزار 628 رہی۔ مارچ کی نسبت اپریل میں 700 کم وارداتیں ہوئیں۔پولیس کا کہنا تھا کہ جرائم پیشہ عناصر کے خلاف کارروائیاں جاری ہیں۔