ڈی جی رینجرزسندھ کی کچے کے علاقے میںپتھاریداروں اور ڈاکوئوں کی سہولت کاری میں ملوث افراد کی فہرستیں تیار کرنے کی ہدایت

کراچی(اُردو پوائنٹ اخبارتازہ ترین - این این آئی۔ 21 مئی2024ء) ڈی جی رینجرزسندھ میجر جنرل اظہر وقاص نے کچے کے علاقے میںپتھاریداروں اور ڈاکوئوں کی سہولت کاری میں ملوث افراد کی فہرستیں تیار کرنے اور ان کے خلاف قانونی کارروائی کرنے کی ہدایت کی ہے ۔ڈی جی رینجرزسندھ میجر جنرل اظہر وقاص نے اندرون سندھ کچے کے علاقوں کا دورہ کیا۔اس موقع پر پولیس اور رینجرز کے اعلی افسران بھی موجود تھے۔

علاقہ سیکٹر کمانڈر کی جانب سے ڈی جی رینجرزسندھ کوجاری آپریشن کے بارے میں تفصیلی بریفنگ دی گئی۔بریفنگ میں بتایاگیاکہ مارچ 2024 سے جاری آپریشن کے دوران نیشنل ہائی وے پر ڈکیتی اور اغوا برائے تاوان کی وارداتوں میں ملوث ارسلاسبزوئی، نندوانی، کوکاری اور بیلو بنگلانی گینگ کے خلاف مشترکہ 45کاروائیوں کے دوران 127جرائم پیشہ افراد کو گرفتارکیا گیاہے۔

(جاری ہے)

مجموعی طور پرپاکستان رینجرزسندھ نے 122 آپریشنز کے دوران 329ڈکیت اور جرائم پیشہ افراد کو گرفتار کر کے بھاری مقدارمیں اسلحہ و ایمونیشن اورمنشیات برآمد کی ہے۔دوران آپریشن کندھ کوٹ میں ارسلا سبزوئی اور بیلو بنگلانی گینگ کے ٹھکانے مسمارکردیئے گئے۔آپریشن کے نتیجے میں109 مغویوں کو بھی بازیاب کروایاگیا۔ڈی جی رینجرزسندھ نے ڈاکوئوں کی کمین گاہوں کابھی فضائی جائزہ لیا۔

انہوں نے موٹر وے اور انڈس ہائی وے پر شہریوں کی نقل وحمل کو محفوظ بنانے کے لیئے گشت بڑھانے سمیت چیک پوسٹوں کومزید فعال کرنے کی ہدایات کی ہیں۔ڈی جی رینجرز سندھ نے کچے کے علاقے میں پولیس کے ہمراہ ڈاکوئوں کے خلاف آپریشن منطقی انجام تک پہنچانے کی ہدایات دیں۔ڈی جی رینجرزسندھ نے پتھاریداروں اور ڈاکوئوں کی سہولت کاری میں ملوث افراد کی فہرستیں تیار کرنے اور ان کے خلاف قانونی کارروائی کرنے جبکہ ڈاکوئوں کی سرکوبی اور شہریوں کے جان ومال کو یقینی بنانے کی ہدایات بھی جاری کی ہیں۔