صوبائی وزیر سید ذوالفقار علی شاہ سے ترکیہ قونصل جنرل جمال سانگوکی ملاقات ، کلچرل سینٹر بنانے کا اعلان

کراچی (اُردو پوائنٹ اخبارتازہ ترین - اے پی پی۔ 22 مئی2024ء) صوبائی وزیر ثقافت، سیاحت، نوادرات و آرکائیوز سندھ سید ذوالفقار علی شاہ سے ترک قونصل جنرل جمال سانگونے انکے دفتر میں ملاقات کی اور دو طرفہ ثقافت و سیاحت کو فروغ دینے پر تفصیلی تبادلہ خیال کیا گیا۔بدھ کو جاری کردہ اعلامیہ کے مطابق ملاقات میں گفتگو کرتے ہوئے ترکیہ کے قونصل جنرل جمال سانگو نے سندھ میں موجود لائبریریز میں کلچرل سینٹر بنانے کا اعلان کیا۔

انہوں نے کہا کہ پہلے مرحلے میں لیاقت میموریل لائبریری کراچی میں کلچرل سینٹر بنایا جائے گا اور دوسرے مرحلے میں ڈویژن کی سطح پر موجود لائبریریز میں کلچرل سینٹر بنائے جائیں گے جبکہ زیر تعلیم طلباء کو ترکیہ حکومت کی جانب سے اسکالرشپ پر ترکی بھی بھیجا جائے گا۔

(جاری ہے)

اس موقع پر صوبائی وزیر سید ذوالفقار علی شاہ نے ترک حکومت کی جانب سے کلچرل سینٹر بنانے اور طلبا کیلئے سکالرشپ کے پروگرام پر اظہار تشکر کیا اور کہا کہ کثیر جہتی ثقافت تک دونوں ممالک کے عوام کی رسائی بنانا لازم ہے۔

انہوں نے کہا کہ دونوں ممالک کے درمیان سیاحت و ثقافت کے فروغ سے عوام کو فائدہ ہوگا، سندھ کی تاریخی مذہبی اور ثقافتی سیاحت دنیا کے سیاحوں کا مرکز ہے لہذا ترکیہ اور پاکستان کے دوستانہ تعلقات کو مزید مضبوط بنانے کیلئے دو طرفہ سیاحت و ثقافت پر مشترکہ اقدامات کی ضرورت ہے۔بعد ازاں صوبائی وزیرنے ترکیہ کے قونصل جنرل جمال سانگو اور حلیل ابراہیم کو سندھی روایتی اجرک اور موہن جو دڑو سے دریافت ہونے والے نوادرات کی نقول بطور تحفہ پیش کیں۔ملاقات میں ریجنل ہیڈ کراچی ، ڈی جی لائبریریز اعجاز شیخ اور ایم ڈی سندھ ٹورازم ڈویلپمنٹ کارپوریشن فیاض شاہ بھی موجود تھے۔