ہم نے جو تیاری کی تھی اس کے مطابق نہیں کھیل پائے، محتشم رشید

کراچی(اُردو پوائنٹ اخبارتازہ ترین - این این آئی۔ 24 اپریل2024ء) پاکستان ویمن ٹیم کے عبوری ہیڈ کوچ محتشم رشید نے کہا ہے کہ ہم نے جو تیاری کی تھی اس کے مطابق نہیں کھیل پائے۔میڈیا سے گفتگو کرتے ہوئے محتشم رشید نے کہا کہ سب سے پہلے ویسٹ انڈیز کو مبارکباد دوں گا، انہوں نے تینوں میچز میں اچھی کرکٹ کھیلی۔انہوں نے کہا کہ ہم نے دوسرے میچ میں اچھی کرکٹ کھیل کر تگڑا مقابلہ کیا تھا، تیسرے میچ میں بھی اچھے کھیل کی اٴْمید تھی مگر ویسٹ انڈیز نے زبردست کھیلا۔

(جاری ہے)

محتشم رشید نے کہا کہ ہم ٹی ٹوئنٹی ورلڈ کپ کی تیاری کر رہے ہیں، ٹی ٹوئنٹی میں ہمارا ریکارڈ اچھا ہے، سیریز میں اچھی کرکٹ دیکھنے کو ملے گی، ہماری نظریں ڈیولپمنٹ پر ہیں، نئے پلیئرز کو موقع دیں گے کہ وہ خود کو منوائیں۔پاکستان ویمن ٹیم کے عبوری ہیڈ کوچ نے کہا کہ عائشہ ظفر، گل فیروزہ، رامن شمیم اچھا کھیل رہی ہیں، ورلڈ کپ سے قبل تمام پلیئرز کو چانس دے کر ایک اچھی ٹیم تیار کرنی ہے، ورلڈ چیمپئن شپ کے پوائنٹس اہم تھے جو ہم نہ لے سکے۔انہوںنے کہاکہ اگلی سیریز کافی اہم ہے، انگلینڈ سے اس کے ہوم پر کھیل رہے ہیں، کوشش کریں گے انگلینڈ کے خلاف پوائنٹس حاصل کریں۔