صنعتوں کو وسعت دینے کے لیے مارک اپ فورا کم کیا جائی: لاہورچیمبر

لاہور (اُردو پوائنٹ اخبارتازہ ترین - آن لائن۔ 23 جنوری2020ء) لاہور چیمبر کے صدر عرفان اقبال شیخ، سینئر نائب صدر علی حسام اصغراور نائب صدر میاں زاہد جاوید احمد نے سٹیٹ بینک آف پاکستان پر زور دیا ہے کہ وہ صنعت سازی کے فروغ اور انہیں وسعت میں مدد دینے کے لیے مارک اپ ریٹ کو سنگل ڈیجٹ تک لائے تاکہ سستے قرضوں کی فراہمی یقینی بنائی جاسکے۔ ایک بیان میں انہوں نے کہا کہاکہ زیادہ مارک اپ کی شرح نجی شعبے میں قرضوں کے حصول کی حوصلہ شکنی کررہی ہے جس سے معاشی سرگرمیاں بھی متاثر ہورہی ہیں ۔

انہوںنے کہا کہ مارک اپ کی موجودہ شرح 13.25فیصد بہت زیادہ ہے جس کا اثر صنعتوں کی پیداواری لاگت پر پڑ رہا ہے، مارک اپ کی شرح سنگل ڈیجٹ تک آنے سے صنعتوں کو فائدہ ہوگا ۔اس کے ساتھ ہی حکومت کو صنعتی ترقی کے اہداف حاصل کرنے ، پیداواری لاگت میں کمی کرنے اور بینکوں کے سرمائے کو گردش میں رکھنے میں مدد ملے گی۔

(جاری ہے)

انہوں نے کہا کہ مارک اپ ریٹ پیداواری لاگت پر اثر انداز ہوتا ہے ، پاکستانی مصنوعات بین الاقوامی مارکیٹ میں ان ممالک کی مصنوعات کا مقابلہ نہیں کر سکتی جن میں مارک اپ ریٹ صفر یا اس سے بھی کم ہے۔

انہوں نے کہا کہ مئی 2018میں مارک اپ کی شرح 6.5فیصد سے بڑھ کر جولائی 2019تک 13.25فیصد تک جا پہنچی۔ اس میں اس قدر اضافہ سے قرضوں کا حصول بہت مہنگا ہو گیا جس نے سرمایہ کاری ، پیداوار اور برآمدات کو شدید متاثر کیا ۔انہوں نے کہا کہ مانیٹری پالیسی میں سختی سے ہمیشہ صنعتی شعبے کو نقصان ہوا ہے۔ ہمیںملک کو پیداواری سرگرمیوں اور سرمایہ کا مرکز بنانے کیلئے خطے میںموجود دیگر ممالک کی طرح جلد از جلد اس صورتحال سے باہر آنا ہو گا ۔ انہوں نے سٹیٹ بینک آف پاکستان پر زور دیا کہ آئندہ مونیٹی پالیسی میں مارک اپ کی شرح میں کم از کم چار سو پوائینٹ کمی کا اعلان کریں۔