صوبائی وزیر کھیل کا نوٹس ،ڈسٹرکٹ اسپورٹس آفیسر خانیوال کو معطل کردیا

لاہور(اُردو پوائنٹ اخبارتازہ ترین - این این آئی۔ 24 مئی2025ء)صوبائی وزیر کھیل پنجاب ملک فیصل ایوب کھوکھر نے ضلع خانیوال میں اسپورٹس آفیسر کی جانب سے کھلاڑیوں کے ساتھ ناروا سلوک کی شکایت کا فوری نوٹس لیتے ہوئے ڈسٹرکٹ اسپورٹس آفیسر محمد حفیظ کو معطل کرنے کے احکامات جاری کر دیئے ہیں۔ یہ کارروائی خانیوال جمنیزیم میں بعض کھلاڑیوں کے ساتھ مبینہ بدتمیزی کی شکایات موصول ہونے پر کی گئی ہے۔

صوبائی وزیر نے ڈی جی اسپورٹس کو ہدایت دی کہ معطل افسر کے خلاف محکمانہ انکوائری فی الفور شروع کی جائے تاکہ حقائق سامنے آ سکیں اور آئندہ ایسے واقعات کی روک تھام کی جا سکے۔صوبائی وزیر نے کہا کہ وزیر اعلیٰ پنجاب مریم نواز کی واضح ہدایات ہیں کہ کھلاڑیوں کے ساتھ کسی قسم کے ناروا سلوک یا بدتمیزی کو کسی صورت برداشت نہیں کیا جائے گا۔

(جاری ہے)

پنجاب حکومت نہ صرف کھلاڑیوں کے ساتھ شفاف اور عزت دار سلوک کو یقینی بنائے گی بلکہ انہیں مکمل تحفظ بھی فراہم کیا جائے گا۔ ملک فیصل ایوب کھوکھر نے ڈی جی اسپورٹس پنجاب کو ہدایت دی کہ صوبے بھر میں اسپورٹس سرگرمیوں کی نگرانی مزید سخت کی جائے اور تمام اضلاع میں کھلاڑیوں کو مناسب سہولیات اور عزت دینے کو یقینی بنایا جائے۔ انہوں نے واضح کیا کہ کھیلوں کے فروغ میں کسی بھی قسم کی رکاوٹ کو ہرگز برداشت نہیں کیا جائے گا۔

اسپورٹس ڈیپارٹمنٹ میں نظم و ضبط برقرار رکھنے اور مثبت ماحول فراہم کرنے کے لیے زیرو ٹالرنس پالیسی پر سختی سے عملدرآمد جاری رہے گا۔صوبائی وزیر کا کہنا تھا کہ ہمارے کھلاڑی پنجاب کا فخر ہیں، پنجاب میں شفاف اور عزت دار سلوک کو یقینی بنایا جائے گا۔ کھلاڑیوں کو تمام ممکنہ سہولیات فراہم کی جارہی ہیں تاکہ وہ ملکی و بین الاقوامی سطح پر پنجاب اور پاکستان کا نام روشن کر سکیں۔