کائس کی سپیشل طالبات نے نئی تعلیمی روایات کا آغاز کیا ہے ،ہمیں ان پر فخر ہے ،ڈاکٹر خالد چوہان

میرپور(اُردو پوائنٹ اخبار تازہ ترین۔20اگست۔2014ء) ڈی آئی جی میرپور ڈویژن ڈاکٹر خالد چوہان نے کہا ہے کہ کائس کی سپیشل طالبات نے نئی تعلیمی روایات کا آغاز کیا ہے ہمیں ان پر فخر ہے ان سپیشل طالبات نے میٹر ک میں اے پلس گریڈ حاصل کر کے اپنی صلاحیتوں کا لوہا منوایا ہے۔ ان خیالات کا اظہار اُنہوں نے سماعت اور گویائی سے محروم سپیشل طلبا و طالبات کی مفت تعلیم کے ادارے کشمیر انسٹیٹیوٹ آف سپیشل ایجوکیشن (کائس) کی میٹرک پاس کرنے والی طالبات سے ایک ملاقات کے دوران کیا۔

اُنہوں نے طالبات کو مبارکباد دیتے ہوئے کہا کہ سپیشل طلبا و طالبات کی تعلیم و تربیت کیلئے سوسائٹی کے ہر فرد کو اپنا کردار ادا کرنا ہو گا تاکہ ترقی یافتہ ممالک کی طرح ان سپیشل افراد کو بھی معاشرے میں عزت و احترام حاصل ہو سکے۔

(جاری ہے)

اس موقع پر کائس کے ڈائریکٹر ڈاکٹر امجد انصاری ، سینئر ٹیچر صبا خان اور محمد سعید احمد بھی موجود تھے۔ ڈاکٹر خالد چوہان نے کہا کہ سپیشل طلبا و طالبات کی ذہنی اور جسمانی تربیت بھی لازمی ہے تاکہ یہ سپیشل بچے اپنے گردو پیش کے حالات سے بھی نہ صرف باخبر ہو سکیں۔

بلکہ ان میں شعور اور آگہی پیدا ہوسکے۔ اس مقصد کیلئے ان سپیشل بچوں کو مختلف پبلک مقامات مثلاً ہسپتال، بنک، مارکیٹ، شاپنگ مال، پولیس سٹیشن، پوسٹ آفس اور دیگر مقامات پر لے جانے کا بھی اہتمام کیا جائے تاکہ ان میں اعتماد کا اضافہ ہو سکے اور یہ سپیشل افراد دوسروں پر انحصار کر کے زندگی گزارنے کے بجائے آزادانہ طور پر روز مرہ کے معاملات و مسائل حل کر سکیں۔

اس موقع پر ڈاکٹر خالد چوہان نے میٹرک میں940نمبرات لیکر آزادکشمیر بھر کے تمام سپیشل طلبا و طالبات میں نیا ریکارڈ قائم کرنے والی طالبہ غلام فاطمہ کو بھی خصوصی مبارکباد دی اور کہا کہ سپیشل بچے بھی ہمارے ملک و قوم کا مستقبل ہیں اور ہماری توجہ انہیں کارآمد شہری بنانے میں اہم کردار ادا کر سکتی ہے۔ اُنہوں نے کہا کہ ان سپیشل بچوں کی سرگرمیاں عوام الناس تک پہنچانے کیلئے پولیس ڈیپارٹمنٹ اپنی خدمات دینے کو تیار ہے کیونکہ ان سپیشل بچوں کو ہر طبقہ فکر کے لوگوں کی اخلاقی مدد کی ضرورت ہے تاکہ ان بچوں میں احساس محرومی کم ہو سکے تاکہ سپیشل بچے بھی نارمل لوگوں کی طرح اپنی روز مرہ کی سرگرمیاں احسن طریقے سے ادا کر سکیں۔