پاکستان حق خود ارادیت کے حصول تک کشمیری بہن بھائیوں کی اخلاقی، سیاسی اور سفارتی مدد جاری رکھے گا، انوار الحق کاکڑ

جموں و کشمیر میں بھارتی مظالم کسی سے ڈھکے چھپے نہیں، نہتے و معصوم کشمیریوں پر ہونیوالے مظالم پر عالمی برادری کی خاموشی تشویشناک ہے، نگران وزیراعظم

پیر 5 فروری 2024 18:15

پاکستان حق خود ارادیت کے حصول تک کشمیری بہن بھائیوں کی اخلاقی، سیاسی ..

مظفرآباد(اُردو پوائنٹ اخبارتازہ ترین - این این آئی۔ 05 فروری2024ء) نگران وزیرِ اعظم انوار الحق کاکڑ نے کہا ہے کہ پاکستان حقِ خود ارادیت کے حصول تک اپنے کشمیری بہن بھائیوں کی اخلاقی، سیاسی اور سفارتی مدد جاری رکھے گا۔ پیر کو یوم یکجہتی کشمیر کے موقع پر نگران وزیراعظم نے آزاد کشمیر کے دارالحکومت مظفر آباد کا دورہ کیا ۔ اس موقع پر نگران وزیرِ اعظم انوار الحق کاکڑ نے وزیرِ اعظم آزاد جموں و کشمیر چوہدری انوار الحق اور سپیکر آزاد جموں و کشمیر قانون ساز اسمبلی چوہدری لطیف اکبرسے ملاقات کی ۔

اس موقع پر اظہار خیال کرتے ہوئے نگران وزیراعظم نے کہا کہ مجھ سمیت پوری پاکستانی قوم حقِ خود ارادیت کے حصول کی جدوجہد میں اپنے کشمیری بہن بھائیوں کے شانہ بشانہ کھڑی ہے، مسئلہ کشمیر کا حتمی و منصفانہ حل صرف اور صرف اقوام متحدہ کی سلامتی کونسل کی قراردادوں کے مطابق آزاد و غیر جانبدار استصوابِ رائے کے تحت ممکن ہے۔

(جاری ہے)

انہوں نے کہا کہ غیر قانونی طور پر بھارت کے زیرِ تسلط جموں و کشمیر میں بھارتی مظالم کسی سے ڈھکے چھپے نہیں، نہتے و معصوم کشمیریوں پر ہونے والے بھارتی مظالم پر عالمی برادری کی خاموشی تشویشناک اور قابل مذمت ہے۔

نگران وزیراعظم نے پاکستان کے اس عزم کا اعادہ کیا کہ پاکستان حقِ خود ارادیت کے حصول تک اپنے کشمیری بہن بھائیوں کی اخلاقی، سیاسی اور سفارتی مدد جاری رکھے گا۔ اس موقع پر وزیراعظم آزادکشمیر اور سپیکر نے نگران وزیراعظم انوار الحق کاکڑ کے یوم یکجہتی کشمیر کے موقع پر مظفر آباد کے دورے کو خوش آئند قرار دیا ۔ انہوں نے کہا کہ بھارت کو وزیرِ اعظم انوار الحق کی یومِ یکجہتی کشمیر کیلئے مظفر آباد آمد سے واضح پیغام پہنچ گیا ہے کہ پاکستانی اور کشمیری بہن بھائیوں کے دل ایک ساتھ دھڑکتے ہیں۔