داعش عصر حاضر کے خوارج ہیں، خون خرابے کے سوا کچھ بھی نہیں جانتے،سعودی مفتی اعظم ،اسلام امن وآشتی کا دین ہے، کسی بیگناہ کے قتل کی کوئی گنجائش نہیں، بیان

اتوار 21 ستمبر 2014 11:02

ریاض (اُردو پوائنٹ اخبار تازہ ترین۔21ستمبر۔2014ء) سعودی عرب کے مفتی اعظم اور علماء کونسل کے چیئرمین الشیخ عبدالعزیز بن عبداللہ آل الشیخ نے شام اور عراق میں سرگرم عسکریت تنظیم داعش کو ایک مرتبہ پھر کڑی تنقید کا نشانہ بناتے ہوئے کہاہے کہ داعشی عناصر خون خرابے کے سوا اور کچھ بھی نہیں جانتے ہیں اور وہ عصر حاضر کے خوارج ہیں،ایک بیان میں سعودی مفتی اعظم کا کہنا تھا کہ اسلام امن وآشتی کا دین ہے، جس میں کسی بے گناہ انسان کے قتل کی کوئی گنجائش نہیں، لیکن داعش ایک ایسا گروپ ہے جو معصوم لوگوں کا خون بہاتا اور ہر طرف تباہی اور بربادی کا مرتکب ہو رہا ہے۔

(جاری ہے)

ان کی گمراہی کے بارے میں عوام الناس کو آگاہ کرنا اہل علم کی ذمہ داری ہے ورنہ وہ سادہ لوح شہریوں کو اپنے چنگل میں پھنساتے رہیں گے۔الشیخ عبدالعزیز آل الشیخ کا کہنا تھا کہ سعودی عرب میں مروجہ نصاب تعلیم میں کوئی نقص نہیں ہے۔ مملکت میں رائج نصاب تعلیم دراصل منہج کتاب سنت کو سامنے رکھ کر تیار کیا گیا ہے۔ بعض ممالک کی جانب سے سعودی عرب کے نظام اور نصاب تعلیم کو دہشت گردی کے فروغ کا باعث قرار دینا پرلے درجے کا جھوٹ ہے۔ ہمارا نصاب تعلیم شر اور فساد سے بچانے اور خیر اور بھلائی کی طرف لے جانے کا ذریعہ ہے۔