عمران خان کی مقبولیت سے خائف حکومت بوکھلاہٹ میں مزید غلطیاں کرے گی‘ عبدالعلیم خان

جمعہ 10 اکتوبر 2014 19:02

لاہور ( اُردو پوائنٹ اخبار تازہ ترین۔10اکتوبر 2014ء) تحریک انصاف ضلع لاہور کے صدر عبدالعلیم خان نے کہا ہے کہ عمران خان کی ملک گیر مقبولیت نے حکمرانوں کے اوسان خطا کردیئے ہیں اور حکومت بوکھلاہٹ میں مزید غلطیاں کرے گی ،ہر شہر سے پی ٹی آئی کو ملنے والی پذیرائی اس امر کا ثبوت ہے کہ سیاسی شعور بیدار ہوچکا ہے اور وہ پرانے نعروں سے باریاں لینے والوں کی ہر قیمت پر رخصتی چاہتے ہیں ۔

ایک بیان میں عبدالعلیم خان نے کہاکہ حکمرانوں کی نااہلی کے باعث ملک کو داخلی اور خارجی دونوں محاذوں پر چیلنجوں کا سامنا ہے جبکہ بھاری مینڈیٹ کا دعوی کرنے والوں کے پاس ان مسائل کا کوئی حل نہیں۔ انہوں نے کہا کہ عمران خان نے عوام سے کیا گیا ہر وعدہ نبھایا ہے اور ملکی سیاسی تاریخ کا سب سے طویل دھرنا اور احتجاج کرکے عوام نے ثبوت دے دیا ہے کہ دھاندلی زدہ جمہوریت انہیں کسی قیمت پر قبول نہیں۔

(جاری ہے)

عبدالعلیم خان نے مزید کہا بالخصوص بھارتی جارحیت کے معاملے پر حکمرانوں کی خاموشی و بے حسی قابل مذمت ہے جو صرف اپنا بزنس بچانے کے لیے معصوم شہریوں کی زندگیاں داوٴ پر لگا رہے ہیں۔ انہوں نے کہا کہ انشاء اللہ اب جلد حکمرانوں کو جانا ہوگا اور عوام کی صحیح معنوں میں منتخب اور ایک جمہوری حکومت منتخب کرنے کا موقع ملے گا۔ عبدالعلیم خان نے کہا کہ ” گو نوازگو“کے نعرے اور خواب کی حقیقت کا وقت بہت قریب ہے۔ جب تحریک انصاف کی سیاسی جدوجہد رنگ لائے گی۔