آصف علی زرداری سے عرفان جعفر خان گکھڑ اور شیراز حسین شیرازی کی ملاقات‘ پاکستان پیپلزپارٹی میں شمولیت کا اعلان

پیر 16 اپریل 2018 21:00

اسلام آباد ۔ (اُردو پوائنٹ اخبارتازہ ترین - اے پی پی۔ 16 اپریل2018ء) سابق صدرپاکستان اور پاکستان پیپلزپارٹی پارلیمنٹیرین کے صدر آصف علی زرداری سے اٹک سے تعلق رکھنے والی معروف سیاسی شخصیت اور گکھڑ برادری کے سردار عرفان جعفر خان گکھڑ اور شیراز حسین شیرازی نے زرداری ہائوس اسلام آباد میں ملاقات کرکے پاکستان پیپلزپارٹی میں شمولیت کا اعلان کیا۔

اس موقع پر پیپلزپارٹی راولپنڈی ڈویژن کے صدر اور سابق وفاقی وزیر سردار سلیم حیدر خان، ملک محمد اعجاز، سردار اسلم خان، ملک محمد ساجد‘ ملک ساجد الرحمن، فوزیہ حبیب اور عامر فدا پراچہ بھی موجود تھے۔ سابق صدر نے سردار عرفان جعفر گکھڑ اور دیگر کی پارٹی میں شمولیت کا خیرمقدم کیا۔ پیپلزپارٹی میں شمولیت اختیار کرنے والے سردار عرفان جعفر خان نے کہا کہ پاکستان پیپلزپارٹی ہی عوام کی اصل پارٹی ہے جو ہر شعبہ زندگی اور طبقے کی بے لوث خدمت کرتی ہے۔

(جاری ہے)

ان رہنمائوں نے پارٹی کے صدر آصف علی زرداری اور چیئرمین بلاول بھٹو زرداری کی قیادت پر مکمل اعتماد کا اظہار کیا۔ سردار عرفان حیدر نے کہا کہ پاکستان پیپلزپارٹی کی قیادت سے مطمئن ہوں جس نے ملک کو بلاول بھٹو زرداری کی صورت میں نوجوان لیڈر دیا ہے۔ بلاول بھٹو زرداری آج کا قائدعوام ذوالفقار علی بھٹو ہے۔ انہوں نے پارٹی صدر کو یقین دلایا کہ آئندہ الیکشن میں نہ صرف اٹک بلکہ پورے ملک میں پاکستان پیپلزپارٹی کامیاب ہوگی۔