مقبوضہ کشمیر میں بھارتی قابض افواج کی جانب سے طاقت کے بے رحمانہ استعمال اور تشدد سے انسانی حقوق کی صورتحال متاثر ،

خطے کے لئے مسائل پیدا ہورہے ہیں، بھارتی فوجی کشمیری خواتین کی عصمت دری کو جنگی ہتھیار کے طور پر استعمال کررہے ہیں، اقوام متحدہ کے سیکرٹری جنرل آزادانہ تحقیقاتی کمیشن قائم کرکے اسے اپنی رپورٹ جنرل اسمبلی کے سامنے پیش کرنے کی ہدایت کریں پارلیمانی کشمیر کمیٹی کے چیئرمین مولانا فضل الرحمن کا بیان

جمعرات 19 اپریل 2018 16:04

مقبوضہ کشمیر میں بھارتی قابض افواج کی جانب سے طاقت کے بے رحمانہ استعمال ..

اسلام آباد ۔ (اُردو پوائنٹ اخبارتازہ ترین - اے پی پی۔ 19 اپریل2018ء) پارلیمانی کشمیر کمیٹی کے چیئرمین مولانا فضل الرحمن نے اقوام متحدہ کی سلامتی کونسل سے اپیل کی ہے کہ وہ مقبوضہ کشمیر میں بھارتی قابض افواج کی جانب سے ظلم و بربریت کا نوٹس لے، بھارتی قابض افواج کشمیری خواتین کی عصمت دری کو جنگی ہتھیار کے طور پر استعمال کررہی ہیں۔ جمعرات کو اپنے ایک بیان میں مولانا فضل الرحمن نے اقوام متحدہ کے سیکرٹری جنرل سے مطالبہ کیا کہ وہ گزشتہ کئی دہائیوں سے جدوجہد کرنے والے کشمیریوں کے خلاف بلا روک ٹوک غیر انسانی سلوک کی تحقیقات کے لئے آزادانہ تحقیقاتی کمیشن قائم کرکے جو جنرل اسمبلی کے سامنے اپنی رپورٹ پیش کرے۔

انہوں نے کہاکہ یہ اقدام عالمی برادری کے سامنے کشمیریوں کے خلاف بھارت کی ان شرمناک کاروائیوںکا بھانڈہ پھوڑتے ہوئے بھارت کو دنیا کے سامنے بے نقاب کرنے میں مدد دے گا۔

(جاری ہے)

حال ہی میں معصوم کشمیری بچی آصفہ کے ساتھ پیش آنے والے واقعہ پر خصوصی توجہ مرکوز کرتے ہوئے انہوں نے بھارتی حکومت کے اس غیر ذمہ درانہ طرز عمل کی مذمت کی ہے۔ انہوں نے کہاکہ ضرورت اس امر کی ہے کہ اس فعل میں ملوث شرپسندوں کو قانون کے کٹہرے میں لانے کے لئے بھارتی عوا م کی جانب سے بھرپور آواز اٹھائی جانی چاہیے۔

انہوں نے کہاکہ بد قسمتی سے پوری کشمیری آبادی قابض بھارتی افواج کے ہاتھوں غیر محفوظ ہے۔ وہ ان کشمیری نوجوانوں کو نشانہ بنارہی ہے جو پر امن طورپر اپنے حق خود ارادیت کے لئے جدوجہد کررہے ہیں ۔ وہ آپریشن کے نام پر ان سے تشدد اور غیر انسانی سلو ک روا رکھے ہوئے ہیں۔ انہوں نے کہاکہ بھارت کی اس بربریت کشمیری عوام میں قابض افواج کے خلاف اشتعال بڑھ رہا ہے اور یہ میڈیا میں شائع ہونے والی ان تصوریوں میں دیکھا جا سکتاہے جس میں سکول یونیفارم میں ملبوس طلباء و طالبات قابض افواج کے خلاف مظاہرہ کررہے ہیں۔

انہوں نے کہاکہ یہ عمل کشمیری عوام کے جذبے کا عکاس ہے جو بھارتی افواج کے خلاف جدوجہد کررہے ہیں ۔انہوں نے بھارتی حکومت سے کہاکہ وہ مسئلہ کشمیر کے حل کے لئے فوری طورپر پاکستان کے ساتھ بامقصد مذاکرات کی میز پر آئے اس مسئلہ کے حل کے لئے فوری اقدامات اٹھائے ۔ مولانا فضل الرحمن نے خبردار کیاکہ بھارتی قابض افواج کی جانب سے طاقت کے بے رحمانہ استعمال اور تشدد سے نہ صرف انسانی حقوق کی صورتحال متاثر ہورہی ہے بلکہ اس سے خطے کے لئے بھی مسائل پیدا ہورہے ہیں۔