عطائی ڈاکٹروں کے خلاف کریک ڈاون کے دوان ضلع بھر میں 18غیر قانونی کلینکس سر بمہر

جمعرات 19 اپریل 2018 18:39

راولپنڈی ۔ (اُردو پوائنٹ اخبارتازہ ترین - اے پی پی۔ 19 اپریل2018ء) ڈسٹرکٹ ہیلتھ اتھارٹی راولپنڈی نے عطائی ڈاکٹروں کے خلاف کریک ڈاون کرتے ہوئے ضلع بھر میں 18غیر قانونی کلینکس سر بمہر کر دیئے ہیں جبکہ غیر رجسٹر اور میڈیکل سہولیات نہ ہونے پر 13نجی طبی مراکز کے خلاف سخت کارروائی کا فیصلہ کیا گیا ہے ۔

(جاری ہے)

گذشتہ روز ’’اے پی پی‘‘ سے بات چیت کرتے ہوئے ڈسٹرکٹ ہیلتھ آفیسرڈاکٹر طاہر رضوی نے بتایا ہے کہ عدالت عظمیٰ کے حکم پر پنجاب کے دیگر شہروں کی طرح ضلع راولپنڈی میں عطائی ڈاکٹروں اور غیر قانونی کلینکس کے خلاف مہم جاری ہے۔

جمعرات کوضلع بھر کی مختلف تحصیلوں جن میں راول ٹاون کی05 کلینکس،کلر سیداں 03،گوجر خان 05 ،کہوٹہ 01 اور پوٹھوار ٹاون میں 04 غیر قانونی کلینکس سیل کئے گئے ہیں۔انہوں نے بتایا ہے کہ مری میں 04کلینکس کے خلاف کارروائی کی گئی جہاں پر ڈاکٹر،عملہ،طبی آلات اور ریکارڈ موجود نہیں تھا جبکہ کوٹلی ستیاں میں غیر رجسٹر 03ہسپتالوں کے خلاف کاروائی کرتے ہوئے چالان جاری کئے گئے ہیں۔