وفاقی دارالحکومت کو محفوظ اور پرامن بنانے کیلئے بڑ ے پیمانے پر اقدامات کئے گئے ہیں،ڈاکٹر سلطان اعظم تیموری

جمعرات 19 اپریل 2018 23:20

اسلام آباد ۔ (اُردو پوائنٹ اخبارتازہ ترین - اے پی پی۔ 19 اپریل2018ء) انسپکٹر جنرل آف اسلام آباد ڈاکٹر سلطان اعظم تیموری نے کہا ہے کہ وفاقی دارالحکومت کو محفوظ اور پرامن بنانے کیلئے بڑ ے پیمانے پر اقدامات کئے گئے ہیں ۔ وفاقی پولیس کی طرف سے جاری تفصیلات کے مطابق انسپکٹر جنرل آف پولیس اسلام آباد ڈاکٹر سلطان اعظم تیموری نے کہا ہے کہ اسلام آباد پولیس بھی دیگر محکموں کی طرح ایک اہم ادارہ ہے اور اسلام آباد پولیس وفاقی دارالحکومت میں سکیورٹی صورتحال کو بہتر بنانے، جرائم کے خاتمہ، شہریوں کی جان و مال کے تحفظ کیلئے انتہائی اہم اقدامات بروئے کار لا رہی ہے جس کی بدولت ضلع بھر میں کرائم کی شرح میں خاطر خواہ کمی واقع ہوئی ہے۔

کمیونٹی پولیسنگ کو فروغ دینے کی بدولت شہریوں کا پولیس پر اعتماد بحال ہوا ہے ۔

(جاری ہے)

اسلام آباد پولیس تمام افسران و جوانوں کیلئے کرپشن پر زیرو ٹالرنس کی پالیسی پر عمل پیرا ہے اور اس سلسلہ میں کرپشن اور دیگر غیر قانونی سرگرمیوں میں ملوث 100سے پولیس ملازمین کو مختلف محکمانہ سزائیں بھی دی گئی ہیں اور اس پر مزید کام جاری ہے ۔آئی جی اسلام آباد نے مزید بتایا کہ اسلام آباد پولیس نے گزشتہ تین ماہ کے دوران ضلع بھر میں منشیات فروشوں کے خلاف ایک خصوصی مہم چلائی جس کے تحت438منشیات فروشوں کو گرفتار کر کے ان کے خلاف 389 مقدمات درج کئے گئے اور ان کے قبضہ سے 122.095کلو گرام چرس،16.439کلو گرام ہیروئن، 2.5کلوگرام افیون، نشہ آ ور گولیاں اور آئس برآمد کی گئی جو کہ گزشتہ سال کی نسبت زیادہ ہے، شراب فروشوں کے خلاف کارروائیوں میں 182ملزمان کو گرفتار کر کے 144مقدمات درج رجسٹر کئے گئے ہی اور ان سے 10388بوتلیں شراب برآمد کی گئی ۔

قحبہ خانوں کے خلاف کارروائیوں کے دوران 85عورتوں اور 62مردوں سمیت 147ملزمان کو گرفتار کر کے 30 مقدمات درج رجسٹر کئے گئے ہیں۔جواریوں کے خلاف 24مقدمات درج کر کی140ملزمان گرفتار کئے گئے ۔ جبکہ ان کے خلاف مزید کریک ڈائون کا سلسلہ جاری ہے ۔سلطان اعظم تیموری نے کہا کہ شہر سے اور خصوصا تعلیمی اداروں سے منشیات ،قحبہ خانوں ،شیشہ سنٹروں کا خاتمہ کیا جائے گا اوراس سلسلہ میں قانون کا برابر اطلاق کیا جائے گاچاہے وہ امیر ہو یا غریب ،ان مکروہ دھندوں میں ملوث عناصر کو قانون کے کٹہرے میں لایا جائے گا۔اسلام آباد کے سات ماڈل پولیس سٹیشنز اور ریسکیو ون فائیو سہولت سنٹر پر شہریوں کو بہتر ین اور معیاری سروسز فراہم کی جارہی ہیں ۔