نیو اسلام آباد ائرپورٹ سے سیکرٹریٹ تک اور میٹرو اسٹیشن کو منسلک کرنے کے لئے نئی لگژری بس سروس کا آغاز

جمعرات 19 اپریل 2018 23:29

اسلام آباد ۔ (اُردو پوائنٹ اخبارتازہ ترین - اے پی پی۔ 19 اپریل2018ء) سیکرٹری اسلام آباد ٹرانسپورٹ اتھارٹی نے نیو اسلام آباد ائرپورٹ سے سیکرٹریٹ تک اور میٹرو اسٹیشن کو منسلک کرنے کے لئے نئی لگژری بس سروس کا آغاز کر دیا، عام شہریوں کے ساتھ ساتھ ائرپورٹ کے ملازمین بھی اس سہولت سے استفادہ کر سکیں گے۔ ضلعی انتظامیہ کے ذرائع نے بتایا کہ ابتداء میں 20ائرکنڈیشنڈ بسیں اسلام آباد کے مختلف روٹس پر چلائی جائیں گی جو میٹروبس سٹیشنز سے منسلک کریں گی جس کے لئے 9روٹس تجویز کئے گئے ہیں جن میں سیکرٹریٹ سے بلیوایریا، بلیو ایریا سے کشمیر ہائی وے اور موٹروے چوک سے نئے اسلام آباد ائرپورٹ تک روٹ کا آغاز کر دیا گیا جس پر آزمائشی طور پر کامیاب تجریہ کیا گیا ہے۔

اسی طرح روات سے سیکرٹریٹ روٹ بھی اس نئے منصوبے میں شامل ہے۔

(جاری ہے)

اسسٹنٹ کمشنر سیکرٹریٹ سعد بن اسد نے بتایا کہ ان ٹرانسپورٹ روٹس کے ذریعے شہر کو نئے اسلام آباد ائرپورٹ کو ملایا جائے گا۔ انہوں نے کہا کہ دیگر دو مجوزہ روٹس ڈی12اور ای 12ڈی17کے لئے بھی شامل ہیں۔ سیکرٹری ٹرانسپورٹ اتھارٹی راولپنڈی خالد یامین ستی نے ’’اے پی پی‘‘ کو بتایا کہ 48کلومیٹر روات سے کچہری چوک سے صدر، پشاور روڈ، چوہڑ چوک، پیرودھائی موڑ، گولڑہ موڑ، چونگی نمبر 26اور موٹروے چوک کا بھی ایک روٹ اس منصوبے کا حصہ ہے۔

سول ایوی ایشن اتھارٹی اور دیگر متعلقہ حکام نے اس حوالے سے انتظامات کے لئے کہا تھا۔ سیکرٹری اسلام آباد ٹرانسپورٹ اتھارٹی نے لگژری ائرکنڈیشنڈ بسوں کا آزمائشی تجربہ کر لیا ہے۔ ڈپٹی کمشنر اسلام آباد کیپٹن (ر) مشتاق احمد کے مطابق 5روپے فی کلومیٹر کے حساب سے کرایہ چارج کیا جائے گا۔