لاہور ،قصور میں حکمران جماعت کے اراکین اسمبلی کی جانب سے عدلیہ کے بارے میں تضحیک آمیز احتجاج کرنے پر تشویش کا اظہار

جمعرات 19 اپریل 2018 23:30

لاہور (اُردو پوائنٹ اخبارتازہ ترین۔ 19 اپریل2018ء) لاہور ہائیکورٹ کے تین رکنی فل بنچ نے قصور میں حکمران جماعت کے اراکین اسمبلی کی جانب سے عدلیہ کے بارے میں تضحیک آمیز احتجاج کرنے پر تشویش کا اظہار کیا ہے اور عندیہ دیا ہے کہ اگر یہ معاملہ ان کے پاس آیا تو اسکا جائزہ لیں گے ۔ لاہور ہائیکورٹ کے جسٹس مظاہر علی اکبر نقوی کی سربراہی میں تین رکنی فل بنچ نے ایم کیو ایم لندن کے قائد کے بیانات کی اشاعت اور نشریات کی پابندی کے لیے درخواستوں پر کارروائی کی سماعت کے اختتام سے قبل بنچ کے سربراہ جسٹس مظاہر علی اکبر نقوی نے قصور میں عدلیہ مخالف احتجاج پر افسوس کا اظہار کیا اس پر اظہر صدیق ایڈووکیٹ نے نشاندہی کی کہ حکمران جماعت کے ارکان اسمبلی کے توہین آمیز احتجاج کی ویڈیو سامنے آنے کے بعد مقدمہ تو درج کر لیا گیا ہے مگر مقدمے میں نرم دفعات شامل کی گئی ہیں اور جرم کے مطابق دفعات کو مقدمے کا حصہ نہیں بنایا گیا اظہر صدیق ایڈووکیٹ نے آگاہ کیا کہ مقدمے میں جرم کے مطابق دفعات شامل کرنے کے لیے آئی جی پولیس پنجاب کو خط لکھ دیا گیا ہے۔

(جاری ہے)

بنچ کے سربراہ نے باور کروایا کہ اگر یہ معاملہ ان کے پاس آیا تو ان کا اسوقت جائزہ لیا جائے گا ابھی دوسرا معاملہ زیر سماعت ہے بنچ کے روبرو وفاقی حکومت نے ایم کیو لندن کے قائد کی تقاریر کی نشریات پر پابندی کی رپورٹ پیش کر دی گی۔ لاہور ہائیکورٹ نے عدالتی احکامات پر عملدرآمد پر اطمینان کا اظہار کیا اور درخواستوں پر آئندہ کارروائی 10 مئی تک ملتوی کر دی۔