اس بات کا کوئی عندیہ نہیں کہ اسد مزید کیمیائی حملہ کرنے والا ہے۔ امریکہ

امریکی حملے کے وقت شام کی فضائی فورس کا کافی میزائل مار گرانے کا روسی دعویٰ غلط ہے،ترجمان پینٹاگان

جمعہ 20 اپریل 2018 12:21

واشنگٹن(اُردو پوائنٹ اخبارتازہ ترین - این این آئی۔ 20 اپریل2018ء) پینٹاگان کے اہلکاروں نے کہاہے کہ گذشتہ ہفتے کے روز امریکہ، فرانس اور برطانیہ کی جانب سے کیے گئے میزائل حملوں کے بعد ایسا کوئی عندیہ نہیں کہ شامی فوج کیمیائی ہتھیاروں کا کوئی مزید حملہ کرنے کی تیاری کر رہی ہے۔ تاہم امریکہ اور اٴْس کے اتحادی چوکنہ ہیں۔

(جاری ہے)

میڈیارپورٹس کے مطابق پینٹاگان کی خاتون ترجمان دانا وائٹ نے بتایا کہ شامی صدر بشار الاسد کو معلوم ہونا چاہیئے کہ دنیا کسی طور پر بھی کیمیائی ہتھیاروں کے استعمال کو برداشت نہیں کرے گی۔

وائٹ نے کہا کہ حالیہ میزائل حملوں کے بعد ’’فوری طور پر روس نے دروغ گوئی کی مہم چلا رکھی ہے، تاکہ شک و شبہات پیدا کیے جائیں اور یوں اٴْس کی سازباز پر پردہ ڈالا جا سکے۔انہوں نے کہاکہ روس نے غلط طور پر دعویٰ کیا ہے کہ شام کی فضائی فورس نے کافی میزائل مار گرائے، جب کہ، حقیقت یہ ہے کہ تمام میزائل ٹھیک ٹھیک نشانے پر لگے۔