سعودی عرب میں چٹانوں پر قرآنی آیات، مختلف قسم کی اشکال اور نقوش دریافت

مذکورہ چٹانوں اور پتھروں کو تخریب کاروں کی دست برد سے محفوظ کرنے کیلئے اقدامات کئے جائیں، عوام کا مطالبہ

جمعہ 20 اپریل 2018 21:28

عسیر(اُردو پوائنٹ اخبارتازہ ترین۔ 20 اپریل2018ء) سعودی عرب میں چٹانوں پر قرآنی آیات، مختلف قسم کی شکلوں اور نقوش دریافت ہوئے ہیں، مذکورہ چٹانوں اور پتھروں کو تخریب کاروں کی دست برد سے محفوظ کرنے کیلئے اقدامات کئے جائیں۔ غیر ملکی میڈیا کے مطابق ایک سعودی شہری نے عسیر ریجن میں چٹانوں پر قرآنی آیات، مختلف قسم کی شکلوں اور نقوش دریافت کئے ہیں۔

مشاہدے سے اندازہ ہوتا ہے کہ یہ جگہ کافی پرانی ہے۔

(جاری ہے)

مقامی شہریوں نے آثارقدیمہ کے محافظ اداروں سے مطالبہ کیا ہے کہ وہ مذکورہ چٹانوں اور پتھروں کو تخریب کاروں کی دست برد سے محفوظ کرنے کیلئے اقدامات کریں۔سعودی شہری حمد آل ملحان نے بتایا کہ اسے آل مہمل کی بستی میں اتفاقیہ طور پر ایک پتھر نظر آیا۔ یہ ایک چٹان کے برابر میں پڑا ہوا تھا۔ غور کرکے دیکھا تو اس پر قرآنی آیتیں تحریر تھیں، مختلف شکلیں بھی بنی ہوئی تھیں۔ پتھر تقریباًڈھائی میٹر لمبا ہے، قرآنی آیتیں بغیر نقطوں کے تحریر ہیں۔ بسم اللہ سے شروعات کی گئی ہے۔اس پر سورہ اخلاص اور سورہ الناس لکھی ہوئی ہے۔