نیورو انسٹی ٹیوٹ جنرل ہسپتال میں سٹیٹ آف دی آرٹ بلڈنگ کی طرح طبی سہولیات بھی شاندار ہونگی ‘پروفیسر غیاث النبی طیب

لاہور(اُردو پوائنٹ اخبارتازہ ترین - این این آئی۔ 22 مئی2018ء) پرنسپل پوسٹ گریجویٹ میڈیکل انسٹیٹیوٹ پروفیسر غیاث النبی طیب نے پنجاب انسٹی ٹیوٹ آف نیورو سائنسز جنرل ہسپتال کو پنجاب ہی نہیں سارے خطے میں اپنی نوعیت کا واحد ادارہ قرار دیتے ہوئے کہا ہے کہ اس انسٹیٹیوٹ کے افتتاح سے دماغی امراض کے لیے بڑے پیمانے پر علاج معالجے کی جدید اور مفت طبی سہولیات فراہم ہوں گی اور کسی ٹریفک یا دیگر حادثے کی شکل میں بھی نیورو سے متعلق پیچیدگیوں کا فوری حل نکالا جا سکے گا۔

پروفیسر غیاث النبی طیب نے کہا کہ 3 ارب روپے کی لاگت کے اس منصوبے میں 500 بیڈز پر مریضوں کو ایک ہی چھت تلے تمام طبی سہولیات اور 24 گھنٹے آپریشن تھیٹر زکی سہولت بھی حاصل ہوں گی اور اس منصوبے میں وزیر اعلی پنجاب محمد شہباز شریف کی ذاتی دلچسپی کا گہرا عمل دخل حاصل ہے۔

(جاری ہے)

پرنسپل پی جی ایم آئی نے کہا کہ پنجاب انسٹی ٹیوٹ آف نیورو سائنسز کی سٹیٹ آف دی آرٹ بلڈنگ کی طرح طبی سہولیات بھی شاندار ہوں گی اور ڈاکٹرز،نرسیں اور پیرا میڈیکل سٹاف زیادہ لگن اور محنت کے ساتھ اپنے فرائض سرانجام دیں گے۔

انہوں نے کہا کہ اس ادارے میں انفیکشن فری ماحول فراہم کیا گیا ہے جہاں سینٹرل ریسرچ لیبارٹری میں دماغ کے علاوہ کینسر سمیت دیگر پیچیدہ بیماریوں کی تشخیص کا بھی بندوبست کیا گیا ہے۔ پروفیسر غیاث النبی طیب نے کہا کہ یہ ادارہ بلا شبہ لاہور جنرل ہسپتال کے لیے ایک اعزاز کی بات ہے جہاں عالمی معیار کو مدنظر رکھتے ہوئے سسٹم تشکیل دیئے گئے ہیں اور ان کے شاندار نتائج سامنے آئیں گے پرنسپل پی جی ایم آئی اور ایم ایس ڈاکٹر محمود صلاح الدین نے پنجاب انسٹی ٹیوٹ آف نیورو سائنسز کے افتتاح پر تمام ڈاکٹرز اور طبی عملے کو مبارکباد دیتے ہوئے کہا کہ انشاء اللہ یہ ادارہ میڈیکل کے شعبے میں کامیابی کے جھنڈے گاڑ ے گا اورعام شہری یہاں کی جدید ٹیکنالوجی سے فائدہ اٹھائے گا۔