ملک کی ترقی وخوشحالی کے لئے تعلیم بنیادی جز اور ریڑھ کی ہڈی کی حیثیت رکھتی ہے،سارہ صفدر

جمعہ 29 جون 2018 19:50

پشاور۔ (اُردو پوائنٹ اخبارتازہ ترین - اے پی پی۔ 29 جون2018ء) خیبر پختونخوا کی نگران وزیر تعلیم ،سماجی بہبوداورمذہبی واقلیتی امور پروفیسرڈاکٹرسارہ صفدر نے کہا ہے کہ کسی بھی ملک کی ترقی وخوشحالی کے لئے تعلیم بنیادی جز اور ریڑھ کی ہڈی کی حیثیت رکھتی ہے اور اس کے بغیر آگے بڑھنے کاتصور بھی نہیں کیا جاسکتا۔وہ جمعہ کے روز بورڈآف انٹرمیڈیٹ اینڈسیکنڈری ایجوکیشن کوہاٹ میںبورڈہذاکے زیراہتمام منعقدہ سالانہ انٹرکالجزاینڈپرائیوٹ سکولزٹورنامنٹ 2017-18ء کے ونراینڈ رنراپ ٹیموں کے تقریب تقسیم اسناد سے بحیثیت مہمان خصوصی خطاب کررہی تھی۔

تقریب سے بورڈ کے چیئرمین عبدالرقیب نے بھی خطاب کیاجبکہ کنٹرولر بورڈ حاجی الیاس آفریدی ،سیکرٹری بورڈ وقاراحمد،مذکورہ کالجز اور سکولز کے پرنسپلزاور ٹورنامنٹ میں حصہ لینے والے کھلاڑی بھی اس موقع پر موجود تھے۔

(جاری ہے)

امان اللہ خان نے سٹیج سیکرٹری کے فرائض انجام دیئے۔صوبائی وزیر نے کہا کہ پاکستان ایک عظیم ملک ہے اور اس کی حفاظت ہم سب کی مشترکہ ذمہ داری ہے۔

ان کا کہناتھا کہ تعلیم ہمارا اثاثہ ہے اور تعلیم کے ساتھ ساتھ مذہبی واخلاقی تعلیم کے علاوہ نصابی و غیر نصابی سرگرمیوں پر بھی بھرپور توجہ دینی ہوگی تاکہ مستقبل کی ذمہ داریوں کے لئے ذہنی اورجسمانی طور پر ایک صحت مند نسل تیارکیاجاسکے۔ان کامزید کہناتھاکہ بچوںکی شخصیت بنانے میں والدین اور اساتذہ کا کردار انتہائی اہمیت کا حامل ہے اس لئے ہمیں اس طرف خصوصی توجہ دینے کی ضرورت ہے۔

ڈاکٹر سارہ صفدر نے ملکی سطح پر کوہاٹ بورڈ کی نمایاں پوزیشن کو سراہتے ہوئے کہاکہ یہ بورڈ کے چیئرمین اور پورے عملے کی مشترکہ کاوشوں کا نتیجہ ہے جس پر یہ سب مبارکباد کے مستحق ہیں۔انہوں نے اس موقع پر بورڈ کے ملازمین کے لئے سروس سٹرکچر بنانے کی یقین دہانی کرائی اور بورڈعملے کے لئے ایک ماہ کے بنیادی تنخواہ کے برابر اعزازیہ کا اعلان بھی کیا۔قبل ازیں مہما ن خصوصی نے ونر اینڈرنراپ ٹیموں کے کھلاڑیوں میں ٹرافیاں اور انعامات تقسیم کیں۔