آج ملک میں محنت کشوں کے ساتھ جو ظلم و زیادتی ہو رہی ہے وہ ماضی میں کبھی نہیں ہوئی، عبداللطیف نظامانی

بجلی کی تقسیم کار کمپنیوں کو نجکاری کے حوالے کیا جا رہا ہے، آئل اور گیس کی مہنگائی نے غریب طبقے کی کمر توڑ دی ہے، ریلی کے شرکاء سے خطاب

جمعہ 1 مئی 2026 21:15

آج ملک میں محنت کشوں کے ساتھ جو ظلم و زیادتی ہو رہی ہے وہ ماضی میں کبھی ..

حیدرآباد(اُردو پوائنٹ اخبارتازہ ترین - این این آئی۔ 01 مئی2026ء) واپڈا ہائیڈرو ورکرز یونین کے مرکزی صدر عبداللطیف نظامانی نے کہا ہے کہ آج ملک میں محنت کشوں کے ساتھ جو ظلم و زیادتی ہو رہی ہے وہ ماضی میں کبھی نہیں ہوئی، بجلی کی تقسیم کار کمپنیوں کو نجکاری کے حوالے کیا جا رہا ہے، آئل اور گیس کی مہنگائی نے غریب طبقے کی کمر توڑ دی ہے، مہنگائی کے تناسب سے محنت کشوں کی کم از کم اجرت ایک لاکھ روپے ماہانہ ہونی چاہیے۔

محنت کشوں کے عالمی دن پر واپڈا ہائیڈرو ورکرز یونین اور فیڈریشن آف ٹریڈ یونینز کے زیر اہتمام مرکزی صدر عبداللطیف نظامانی کی قیادت میں صوبائی، زونل، ڈویژن، سب ڈویژنل یونین کے عہدیداروں اور کارکنوں نے سرخ جھنڈے اٹھائے لیبر ہال گاڑی کھاتہ سے پریس کلب تک ریلی نکالی۔

(جاری ہے)

یونین کے مرکزی عبداللطیف نظامانی نے خطاب کرتے ہوئے شکاگو کے شہیدوں کو خراجِ تحسین پیش کیا اور کہا کہ یکم مئی محنت کشوں کی جدوجہد، قربانی اور عزمِ نو کا دن ہے، جو ہمیں یہ یاد دلاتا ہے کہ 1886 میں شکاگو کے مزدوروں نے اپنے بنیادی حقوق کے حصول کے لئے جو لازوال قربانیاں دیں وہ انسانی تاریخ کا ایک سنہرا باب ہے، انہوں نے کہا کہ تجربہ کی بنا پر ادارے تباہ کر دیئے گئے ہیں، محنت کشوں کو ریگولر ملازمت، پینشن کی مراعات، ترقیوں اور اپ گریڈیشن جیسے آئینی حق سے محروم کر دیا گیا ہے، کنٹریکٹ، ڈیلی ویجز، لم سم پیکیج کے بھرتی کئے ہوئے ملازمین کو ریگولر نہیں کیا جا رہا، بجلی کے حادثات سے شہید ہونے والے ملازمین کے بچوں کو بھرتی سے محروم کر دیا گیا ہے، ادارے میں 50 فیصد سے زائد ملازمتیں خالی ہیں، جس کی بنا پر حادثات میں اضافہ ہو رہا ہے۔