شکست (ن) لیگ کا مقدر بن چکی ہے اور تحریک انصاف اقتدار میں آکر کرپشن کا خاتمہ کرے گی ،ْعمران خان

بدھ 11 جولائی 2018 18:01

اسلام آباد(اُردو پوائنٹ اخبارتازہ ترین - این این آئی۔ 11 جولائی2018ء) پاکستان تحریک انصاف کے چیئرمین عمران خان نے کہا ہے کہ شکست (ن) لیگ کا مقدر بن چکی ہے اور تحریک انصاف اقتدار میں آکر کرپشن کا خاتمہ کرے گی۔اسلام آباد میں اقلیتی کنونشن سے خطاب کے دوران عمران خان نے کہا کہ قائداعظم کا پاکستان ایک فلاحی ریاست تھی، مدینہ کی فلاحی ریاست میں اقلیتوں کو بھی حقوق حاصل تھے، غریبوں کو بنیادی حقوق دینا ریاست کی ذمے داری ہے، آزاد معاشرے میں قانون غریب کو امیر سے طاقتور کردیتا ہے، مہذب معاشرے میں بیروزگاروں کو فنڈز دیے جاتے ہیں۔

پاکستان کے آئین کا تمام ابتدائیہ حقوق سے متعلق ہے لیکن پاکستان میں کمزور طبقے کو حقوق نہیں ملتے کیوں کہ قانون کی بالادستی نہیں ہوتی تو کمزورکو نقصان اٹھاناپڑتا ہے، غریب کو انصاف دینے کیلئے ملک کے پاس وسائل نہیں، تعلیم ہر بچے کا بنیادی حق ہے جو کہ اس ملک میں نہیں دیا گیا۔

(جاری ہے)

ڈھائی کروڑ بچے اسکول ہی نہیں جاتے۔ ملک میں 45 فیصد بچے غذائی قلت کی وجہ سے بیمارہیں۔عمران خان نے کہا کہ مغرب میں منی لانڈرنگ کرنے والا لوگوں میں جانے کی جرات نہیں کرتا لیکن یہاں 300 ارب روپے کی منی لانڈرنگ کرنے والا معصوم بنا ہوا ہے، ایک مجرم پکڑا گیااور وہ کہتا ہے کہ واپسی پر میرا استقبال کرو، شکست (ن) لیگ کا مقدر بن چکی ہے، تحریک انصاف اقتدار میں آکر کرپشن کا خاتمہ کرے گی۔