عمران خان کو وزرات عظمیٰ کے حلف سے روکنے کی درخواستوں پرسماعت (آج)اسلام آباد ہائی کورٹ میں ہوگی

اتوار 5 اگست 2018 14:10

اسلام آباد (اُردو پوائنٹ اخبارتازہ ترین - این این آئی۔ 05 اگست2018ء) پاکستان تحریک انصاف کے چیئرمین عمران خان کو وزرات عظمیٰ کے حلف سے روکنے کی درخواستوں پرسماعت (آج)پیر 6اگست کو اسلام آباد ہائی کورٹ میں ہوگی۔اسلام آباد ہائی کورٹ کے جسٹس عامر فاروق پی ٹی آئی چیئرمین کی نااہلی اور وزارت عظمیٰ کا حلف اٹھانے سے روکنے کی متفرق درخواست کی سماعت کریں گے۔

(جاری ہے)

شہدا فائونڈیشن کے حافظ احتشام کی جانب سے عمران خان کے خلاف دائرکی گئی درخواست میں وفاق،اسپیکر قومی اسمبلی،الیکشن کمیشن،وزارت خارجہ،عمران خان اور ریحام کو فریق بنایا گیا ہے۔درخواست میں بتایا گیا کہ عمران خان کو پٹیشن پر فیصلے تک وزارت عظمیٰ کا حلف اٹھانے سے روکا جائے۔عمران خان 5 حلقوں سے رکن قومی اسمبلی منتخب ہوئے مگر وہ آئین کے آرٹیکل 62 کے تحت اہل نہیں،انہوں نے اپنے کاغذات نامزدگی میں حقائق چھپائے اور صرف دو بیٹوں سمیت ایک اہلیہ کو زیر کفالت ظاہر کیا۔

عمران خان کے کاغذات نامزدگی میں ان کی مبینہ ناجائز بیٹی ٹیریان جیڈ وائٹ کا ذکر نہیں جو 1992 میں امریکی خاتون سیتا وائٹ کے بطن سے پیدا ہوئی۔درخواست میں کہا گیا کہ امریکی عدالت کے سامنے عمران خان نے ٹیریان کا باپ ہونے سے انکار نہیں کیاتھا۔