پی ایم ڈی سی نے کے ایم یو انسٹی ٹیوٹ آف ڈینٹل سائنسزکوہاٹ کی رجسٹریشن کا نوٹیفیکیشن جاری کردیا

پشاور۔19 نومبر(اُردو پوائنٹ اخبارتازہ ترین - اے پی پی۔ 19 نومبر2018ء) خیبرمیڈیکل یونیورسٹی انسٹی ٹیوٹ آف ڈینٹل سائنسز(کڈز) کوہاٹ کی پاکستان میڈیکل اینڈ ڈینٹل کونسل کے ساتھ رجسٹریشن کادیرینہ مسلئہ حل ہوگیا۔پی ایم ڈی سی اور وفاقی وزارت صحت ،ریگولیشنز زاینڈ کوآرڈینیشنزاسلام آباد کی جانب سے گزشتہ روز کڈز کی رجسٹریشن کا نوٹیفیکیشن جاری ہونے سے جنوبی اضلاع کے واحد ڈینٹل کالج کے سینکڑوں طلباء وطالبات اور ان کے والدین میں خوشی کی لہر دوڑ گئی ہے ۔

واضح رہے کہ کڈز جو خیبر پختونخوا کے گیارہ جنوبی اضلاع کا واحد پبلک سیکٹر ڈینٹل کالج ہے کا پچھلے پانچ سالوںسے پی ایم ڈی سی کے ساتھ رجسٹریشن کا دیرینہ ایشوچلا آرہا تھا جس کے باعث یہاں کے سینکڑوں فارغ التحصیل اور زیر تعلیم طلباء وطالبات کا مستقبل دائو پر لگا ہواتھا جنہیںپی ایم ڈی سی کے ساتھ رجسٹریشن نہ ہونے کے باعث جہاں ہائوس جاب کی تنخواہیں نہیں مل رہی تھیں وہاں انہیں ایف سی پی ایس ٹریننگ اور روزگار کی دستیابی میں بھی قانونی پیچیدگیوں اور مشکلات کا سامناکرنا پڑ رہا تھالہٰذا اس سینکڑوں طلباء وطالبات کے مستقبل سے وابستہ اس سنگین مسئلے کو یونیورسٹی کے موجودہ وائس چانسلر پروفیسر ڈاکٹر ارشد جاوید نے بطور چیلنج قبول کیا اور پچھلے چند ماہ کی شبانہ روز کوششوں کے نتیجے میں کڈز کی نہ صرف پی ایم ڈی سی کے ساتھ رجسٹریشن کادیرینہ مسئلہ ہو گیا ہے بلکہ وفاقی وزارت صحت ،ریگولیشنز زاینڈ کوآرڈینیشنزاسلام آباد نے رجسٹریشن کا باقاعدہ نوٹیفیکیشن جاری کرکے ان سینکڑوں طلباء وطالبات کی ہائو س جاب تنخواہوں،ایف سی پی ایس ٹریننگ اور روزگار کاراستہ بھی ہموار کر دیا ہے جس پر کالج کے طلباء وطالبات،فیکلٹی،والدین اور منتخب نمائیندوں نے اطمینان کا اظہار کرتے ہوئے توقع ظاہر کی ہے کہ یونیورسٹی کے موجودہ وائس چانسلر کڈز کو صوبے کامعیاری ڈینٹل کالج بنانے کے لئے اپنی کوششیں اسی طرح جاری رکھیں گے۔

(جاری ہے)

دریں اثناء کے ایم یو کے وائس چانسلر پروفیسر ڈاکٹر ارشد جاوید نے کڈز کی پی ایم ڈی سی کے ساتھ رجسٹریشن کا دیرینہ مسلئہ حل ہونے پرپی ایم ڈی سی انتظامیہ بالخصوص کونسل کے صدر جسٹس (ریٹائرڈ)میاں شاکر اللہ جان کا شکریہ ادا کیا ہے اورمتعلقہ طلباء وطالبات اور ان کے والدین کومبارک با ددیتے ہوئے کہاہے کہ کڈز کی پی ایم ڈی سی کے ساتھ رجسٹریشن سے جہاں طلباء وطالبات کو ڈینٹل علوم میں تدریس کے جدید مواقع دستیاب ہونگے وہاں صوبے کے جنوبی اضلاع کے لوگوں کو دانتوں کے امراض کی تشخیص اور علاج معالجے کی بہترین سہولیات بھی میسرہونگی۔

انہوں نے کہا کہ کڈز میں بین الاقوامی معیارکی 75 ڈینٹل چیئرز کی تنصیب کے علاوہ مطلوبہ سٹاف کی تعیناتی کو ہنگامی بنیادوں پر بطور چیلنج قبول کیا گیا جس کے نتیجے میں حال ہی میں ہونے والے پی ایم ڈی سی کی انسپکشن وزٹ میں کالج کو 1000میں سے 902نمبروں کا ملنا اس بات کا ثبوت ہے کہ کے ایم یو نہ صرف کڈز کوبلکہ یونیورسٹی کے تمام ذیلی اداروں کو بین الاقوامی معیار کے مطابق بنانے کے لئے تمام ضروری اقدامات بروئے کار لا رہی ہے۔