اسلام آباد ہائی کورٹ نے آصف علی زرداری کی نااہلی کے لیے درخواست پر رجسٹرار آفس کے اعتراضات دور کر دیے

منگل 29 جنوری 2019 19:26

اسلام آباد ۔ (اُردو پوائنٹ اخبارتازہ ترین - اے پی پی۔ 29 جنوری2019ء) اسلام آباد ہائی کورٹ نے سابق صدر اور پاکستان پیپلز پارٹی کے شریک چیئرمین آصف علی زرداری کی نااہلی کے لیے درخواست پر رجسٹرار آفس کے اعتراضات دور کر دیئے۔عدالت نے حکم دیا کہ رجسٹرار آفس دونوں درخواستوں کو نمبر لگا دیں جوڈیشل طریقے سے کیسز کو سن لیں گے۔منگل کو عدالت عالیہ کے چیف جسٹس اطہر من اللہ نے پاکستان تحریک انصاف کی جانب سے دائر درخواست پر سماعت کی ۔

عدالت نے حکم دیا کہ رجسٹرار آفس کے اعتراضات دورست ہیں،آپ کو الیکشن کمیشن میں جانا چاہیے ۔

(جاری ہے)

چیف جسٹس اطہر من اللہ نے ریمارکس دیئے کہ سیاسی معاملات کو عدالت میں کیوں لاتے ہو، بہت سارے کیس عدالت میں التوا کا شکار ہیں،اس معاملے کو پارلیمنٹ لے جائیں۔سماعت کے موقع پر درخواست گزار وزیر مملکت عثمان ڈار اور خرم شیر زمان کی جانب سے سکندر بشیر ایڈووکیٹ عدالت میں پیش ہوئے ۔درخواست گزار کے وکیل نے موقف اختیار کیا کہ آصف علی زرداری نے کاغذات نامزدگی میں اپنے اثاثے چھپائے جس کی وجہ سے وہ صادق اور امین نہیں رہے، سابق صدر آصف زرداری این اے 213 سے رکن قومی اسمبلی منتخب ہوئے، ہائیکورٹ آئین کے آرٹیکل 62 ون ایف کے تحت آصف علی زرداری کو نااہل قرار دے۔