صدرمملکت ڈاکٹر عارف علوی سے آڈیٹر جنرل آف پاکستان جاوید جہانگیر کی ملاقات

مالی سال 2017-18ء کی سالانہ آڈٹ رپورٹ پیش کی

بدھ 11 ستمبر 2019 16:35

اسلام آباد (اُردو پوائنٹ اخبارتازہ ترین - اے پی پی۔ 11 ستمبر2019ء) صدرمملکت ڈاکٹر عارف علوی سے آڈیٹر جنرل آف پاکستان جاوید جہانگیر نے بدھ کو ایوان صدر میں ملاقات کی اور مالی سال 2017-18ء کی سالانہ آڈٹ رپورٹ پیش کی۔ مالی سال 2017-18ء کے دوران 13652.145 ارب روپے کا آڈٹ کیا گیا اور 127.279 ارب روپے بازیاب کئے گئے۔

(جاری ہے)

آڈیٹر جنرل آف پاکستان کے آفس کی آئینی اہمیت کو اجاگر کرتے ہوئے صدر مملکت نے کہاکہ بہتر اسلوب حکمرانی کو یقینی بنانے کے لئے شفافیت کسی بھی حکومت کی ترجیحی ہونی چاہیے۔

انہوں نے اس بات پر زور دیاکہ آڈٹ کے عمل میں جدید ٹیکنالوجی کو بروئے کار لایا جانا چاہیے تاکہ شفافیت یقینی ہو اور استعداد کار میں مزید اضافہ کیا جا سکے۔ آڈیٹر جنرل آف پاکستان نے صدر مملکت کو سالانہ رپورٹ سے آگاہ کرتے ہوئے بتایاکہ ادارے میں مستعدی اور نظم و ضبط کو یقینی بنانے کے لئے ہر ممکن کوشش کی جا رہی ہے تاکہ پاکستان کوبد عنوانی کی لعنت سے پاک کیا جا سکے۔ انہوں نے صدر مملکت کو بتایاکہ آڈٹ کے عمل کو خود کار بنانے کا عمل جاری ہے۔