وزیراعظم پاکستان عمران خان (آج) مظفرآباد میں کشمیری عوام سے اظہاریکجہتی کیلئے خطاب کریں گے

مودی آج مقبوضہ کشمیر کے کسی شہر ، گائوں میں نہیں جاسکتا اور دوسری جانب پاکستان کا وزیراعظم جہاں چاہے آزاد کشمیر میں آجاسکتا ہے‘خواجہ فاروق احمد

جمعرات 12 ستمبر 2019 15:00

مظفرآباد(اُردو پوائنٹ اخبارتازہ ترین - این این آئی۔ 12 ستمبر2019ء) تحریک انصاف پاکستان کے مرکزی جائنٹ سیکرٹری خواجہ فاروق احمد نے آزاد کشمیر کے عوام بالخصوص مظفرآبادڈویژن کے عوام سے اپیل کی ہے کہ وہ بلا تخصیص آج یونیورسٹی کالج گرائونڈ آئیں جہاں وزیراعظم پاکستان عمران خان کشمیری عوام سے اظہار یکجہتی کیلئے خطاب کرینگے ۔ خواجہ فاروق احمد نے کہا کہ یہ کوئی سیاسی پارٹی کا جلسہ نہیں ہے ۔

(جاری ہے)

عمران خان دنیاکو مظفرآباد کے اس جلسے سے یہ پیغام دینا چاہتے ہیں کہ مودی اور وزیراعظم عمران خان میں یہی فرق ہے کہ مودی آج مقبوضہ کشمیر کے کسی شہر ، گائوں میں نہیں جاسکتا اور دوسری جانب پاکستان کا وزیراعظم جہاں چاہے آزاد کشمیر میں آجاسکتا ہے ۔ یہی رائے شماری ہے جو دنیا کو دکھانا مقصود ہے ۔ انہوں نے عوام سے اپیل کی کہ وہ پارٹی کے جھنڈے نہ لائیں صرف آزاد کشمیر کے پرچم ساتھ لائیں تاکہ عوام میں مکمل یکجہتی کا اظہار رہے ۔ تمام ریلیاں ، جلوس ، جلسہ گاہ میں 2بجے تک پہنچ جائیں تاکہ عمران خان جو ٹھیک 3بجے جلسہ گاہ میں آئیں گے تو انہیں گرائونڈ سمندر کا منظر پیش کررہا ہو۔