سیالکورٹ ائیرپورٹ پر برطانوی جوڑے سے کروڑوں روپے مالیت کی ہیروئن برآمد

برآمد ہونے والی ہیروئن کی قیمت 20 لاکھ پاؤنڈز ہے جو پاکستانی روپوں میں 38 کروڑ 94 لاکھ روپے سے زائد بنتی ہے،رپورٹ

ہفتہ 21 ستمبر 2019 18:57

سیالکورٹ ائیرپورٹ پر برطانوی جوڑے سے کروڑوں روپے مالیت کی ہیروئن برآمد

سیالکوٹ (اُردو پوائنٹ اخبارتازہ ترین - این این آئی۔ 21 ستمبر2019ء) سیالکورٹ ائیرپورٹ پر برطانوی جوڑے سے کروڑوں روپے مالیت کی 25 کلو ہیروئن برآمد کر لی گئی۔برطانوی جریدے ڈیلی میل کی رپورٹ کے مطابق یوکشائر سے تعلق رکھنے والے 26 سالہ محمد طاہر ایاز اور ان کی 20 سالہ اہلیہ اقراء حسین کو سیالکوٹ انٹرنیشنل ائیرپورٹ پر گرفتار کیا گیا جن کے سامان سے اعلیٰ کوالٹی کی 25 کلو گرام ہیروئن برآمد ہوئی۔

رپورٹ کے مطابق ائیرپورٹ سیکیورٹی فورس (اے ایس ایف) نے ہیروئن خاتون کے سامان سے برآمد کی جو انہوں نے کپڑوں میں چھپا رکھی تھی۔اے ایس ایف حکام کے مطابق برطانوی جوڑا پاکستان سے براستہ دبئی لندن ہیروئن اسمگل کرنے کی کوشش کر رہا تھا، جوڑے کو پہلے امارات ائیرلائن کی پرواز ای کے 621 سے دبئی اور پھر وہاں سے لندن روانہ ہونا تھا۔

(جاری ہے)

اے ایس ایف حکام نے جوڑے کو فوری طور پر حراست میں لیتے ہوئے ان کے خلاف کیس دائر کر دیا ہے اور دونوں کے خلاف تحقیقات کا آغاز بھی کر دیا گیا ہے۔

اے ایس ایف کی جانب سے ملزمان اور برآمد ہونے والی ہیروئن کو انسداد منشیات فورس (اے این ایف) کے حوالے کر دیا گیا ہے۔رپورٹ کے مطابق برآمد ہونے والی ہیروئن کی قیمت 20 لاکھ پاؤنڈز ہے جو پاکستانی روپوں میں 38 کروڑ 94 لاکھ روپے سے زائد بنتی ہے۔