اوکاڑہ، ایل پی جی ڈیلرز اور ریفلنگ سنٹرز میں سیفٹی آڈٹ اور فائر سیفٹی بارے تربیتی کورسز کا آغاز

جمعہ 27 ستمبر 2019 16:57

اوکاڑہ (اُردو پوائنٹ اخبارتازہ ترین - اے پی پی۔ 27 ستمبر2019ء) پنجاب ایمرجنسی سروس (ریسکیو1122) اوکاڑہ نے ہیڈ کوارٹر کی ہدایت ضلع بھر میں ایل پی جی LPG ڈیلرز اور ریفلنگ سنٹرز میں سیفٹی آڈٹ اور فائر سیفٹی کے حوالہ سے تربیتی کورسز کا آغاز کر دیا ہے ۔ اس سلسلے میںکمیونٹی سیفٹی ونگ ریسکیو1122 اوکاڑہ نے شہر کے 4 بڑے ایل پی جی ڈیلرز اور ر ی فیلنگ سنٹرز کا سیفٹی آڈٹ کیا اور وہاں پرموجودآگ پر قابو پانے والے آلات کی جانچ پڑتال کی ۔

بعد ازاں ایل پی جی ڈیلرز اور ری فیلنگ سنٹرز کے مالکان اور ملازمین کو فا ئر سیفٹی اور ابتدائی طبی امداد کے حوالے سے تربیت دی گئی ۔ تربیتی کورس میںشرکاء کو آگ بجھانے والے آلات کا استعمال ، ابتدائی طبی امداداور ہنگامی انخلاء کا طریقہ کار پر آگاہی لیکچرز فراہم کیے گئے کہ اگرخدانخواستہ آگ لگ جائے تو فوری طور پر آگ پرکس طرح قابو پاناہے اور اگر کوئی شخص آگ سے متاثر ہو گیا ہے تو اس کوبروقت کیا ابتدائی طبی امداد فراہم کرنی ہے۔

(جاری ہے)

اور لیکچرز کے بعد شرکاء نے باری باری آگ پر قابو پانے والے آلات کو چلانے کا عملی مظاہرہ بھی کیا۔ اس موقع پر ڈسٹرکٹ ایمرجنسی آفیسر ظفراقبال کا کہنا تھا کہ اس سیفٹی آڈٹ اور تربیتی کورس کا مقصد ایل پی جی سلنڈرز کی وجہ سے بڑھتے ہوئے آگ کے واقعات اور ان میں ہونے والی جانی و مالی نقصان میں کمی لانا ہے۔ ایل پی جی ڈیلرز اور ری فیلنگ سنٹرز کے مالکان کی جانب سے ریسکیو 1122 اوکاڑہ کے سیفٹی آڈٹ اور تربیتی کورس کے انعقاد کو سراہا۔