مظفرگڑھ ،پولیس کا آئل مافیا کے خلاف کریک ڈاؤن ،تیل چوری کرنے کی کوشش ناکام بنا دی

جمعہ 27 ستمبر 2019 16:57

مظفرگڑھ (اُردو پوائنٹ اخبارتازہ ترین - اے پی پی۔ 27 ستمبر2019ء) پولیس کا آئل مافیا کے خلاف کریک ڈاؤن پارکو آئل ریفائنری کی پائپ لائن سے تیل چوری کرنے کی کوشش قصبہ گجرات چوکی انچارج نے پولیس ٹیم کے ہمراہ ناکام بنادی، پولیس ٹیم نے بروقت کاروائی کرتے ہوئے خالی مکان کے ذریعے سرنگ کھود کر تیل چوری کی بڑی واردات کا سراغ لگایا، مقدمہ درج کرلیا گیا تفصیل کے مطابق قصبہ گجرات میں قائم پاک عرب آئل ریفائنری کی پائپ لائن پر کلمپ لگاکر کروڑوں روپے مالیت کا تیل چوری کی واردات کا منصوبہ بنایا جارہا تھا کہ قصبہ گجرات میں تعینات نوجوان پولیس آفیسر سب انسپکٹر ملک سلیم لنگڑیال نے پولیس ٹیم اور پارکو کے اہلکاروں کے ہمراہ بروقت کاروائی کرتے ہوئے خالی مکان میں سرنگ کھود کر پائپ لائن سے تیل چوری کا منصوبہ ناکام بنادیا ہے جبکہ آئل مافیا کے خلاف کاروائی کرتے ہوئے تین نامزد ملزمان کے خلاف سنگین دفعات کے تحت مقدمہ بھی درج کرلیا ہے جبکہ پارکو آئل ریفائنری سے تیل چوری کے واردات کے انکشاف پر ڈی پی او مظفرگڑھ صادق علی ڈوگر نے بھی سخت نوٹس لیا اور آئل مافیا سے آہنی ہاتھوں سے نمٹنے کے لیے ڈی ایس پی کوٹ ادو اعجاز بخاری، ایس ایچ او محمود کوٹ عبدالرئوف اور چوکی انچارج ملک سلیم حسن کو ہدایات کی جس پر پولیس ٹیم نے آئل مافیا کے خلاف کریک ڈائون کا آغاز کرتے ہوئے گھیرا تنگ کردیا ہے۔