پشاور میڈیکل کالج کے زیر اہتمام بریسٹ کینسر سے آگاہی کے لئے سیمینار کا انعقاد

پشاور (اُردو پوائنٹ اخبارتازہ ترین - اے پی پی۔ 06 نومبر2019ء) سوشل ویلفیئر سوسائٹی پشاور میڈیکل کا لج( پی ایم سی) پشاورکے زیر اہتمام بریسٹ کینسر کے مختلف پہلوئوں،اسباب اور علاج معالجے سے متعلق آگاہی سیمینار کا انعقاد کیا گیا جس میں کالج کے طلباء وطالبات اورفیکلٹی نے کثیر تعداد میں شرکت کی ۔سیمینار کے مہمان خصوص معروف ماہر امراض کینسر اور حیات آباد میڈیکل کمپلیکس آنکالوجی یونٹ کے سربراہ پروفیسر ڈاکٹر عابد جمیل تھے جب کہ کویت ٹیچنگ ہسپتال سرجری یونٹ کی اسسٹنٹ پروفیسر ڈاکٹر سعدیہ شاہ نے بطور ماہر کینسر کے مختلف پہلوئوں،اسباب اور علاج معالجے پر تفصیل سے تبادلہ خیال کیا ۔

ماہرین نے سیمینار سے اظہار خیال کرتے ہوئے کہا کہ بریسٹ کینسر دنیا میں تیزی سے پھیلنے والا موذی مرض ہے جس کا ابتدائی دنوں میں تشخیص اور علاج ضروری ہے بصورت دیگر یہ جان لیوا ثابت ہو سکتا ہے۔

(جاری ہے)

انہوں نے کہاکہ دنیا میں مختلف امراض سے ہونے والی اموات میں بریسٹ کینسرسے ہونے والی اموات میں پچھلے چند سالوں کے دوران خطرناک حد تک اضافہ ہو اہے ۔

انہوں نے کہا کہ پاکستان میں کم شعور اور علاج معالجے کی سہولیات کے فقدان کے باعث یہ مرض اور بھی خطرناک صورتحاک اختیار کر چکاہے۔ماہرین نے بتایا کہ پاکستان میں ہر 9 میں سے ایک خاتون بریسٹ کینسر کے موذی مرض میں مبتلا ہے جس کے نتیجے میں خواتین کی شرح اموات میں مسلسل اضافہ ہو رہا ہے۔انہوں نے کہا کہ بروقت تشخیص اور علاج معالجے سے بریسٹ کینسر پرنہ صرف قابو پایاجاسکتاہے بلکہ بڑے پیمانے پر عوامی شعور کی بیداری کے ذریعے اس موذی مرض سے بچائو اورابتدائی دنوں میں علاج بھی ممکن ہے۔

تقریب سے ڈین پشاور میڈیکل کالج پروفیسر ڈاکٹر نجیب الحق نے بھی خطاب کیا جب کہ آخر میں انہوں نے مہمان مقررین کو شیلڈز اور سوشل ویلفیئر سوسائیٹی کے عہدیداران کو کامیاب سیمینار کے انعقاد پر توصیفی سرٹیفیکیٹ پیش کیئے۔