کابینہ کی ذیلی کمیٹی کے بدھ کو اجلاس کی اطلاع نہیں تھی، عطا اللہ تارڑ

بدھ 13 نومبر 2019 13:31

اسلام آباد (اُردو پوائنٹ اخبارتازہ ترین - اے پی پی۔ 13 نومبر2019ء) مسلم لیگ (ن) کے ڈپٹی سیکرٹری جنرل عطا اللہ تارڑ نے خود سے منسوب بیان کی تردید کرتے ہوئے کہا ہے کہ وہ گزشتہ روز کابینہ کی ذیلی کمیٹی برائے ای سی ایل کے اجلاس میں ڈاکٹر عدنان کے ہمراہ مؤقف پیش کر چکے ہیں، کابینہ کی ذیلی کمیٹی کے بدھ کو اجلاس کی اطلاع نہیں تھی۔

(جاری ہے)

اپنے وضاحتی بیان میں انہوں نے کہا کہ کمیٹی کے اجلاس کے بائیکاٹ کی خبر حقائق کے برعکس ہے۔

انہوں نے کہا کہ وزارت داخلہ نے ہمارے رابطہ کرنے پر بتایا کہ بدھ کو اجلاس نہیں ہے۔ وزارت داخلہ کی طرف سے کہا گیا کہ اگر آپ کے مؤقف میں کوئی تبدیلی ہو تو اس کی اطلاع کر دی جائے۔ انہوں نے کہا کہ ہماری طرف سے واضح کیاگیا کہ محمد نواز شریف کی ہدایت کے مطابق ہمارے مؤقف میں کوئی تبدیلی نہیں ہے ۔