دنیا کی ذہین ترین شطرنج، جس میں چھوئے بغیر ہی پیس اپنی جگہ بدلتے ہیں

امین اکبر منگل 3 دسمبر 2019 23:39

سکوائر آف، دنیا کا ذہین ترین اور سب سے زیادہ مربوط شطرنج کا بورڈ ہے۔ شطرنج کے اس بورڈ میں سینکڑوں سال پرانے اس کھیل میں جدید ترین ٹیکنالوجی شامل کی گئی ہے۔اس شطرنج میں کھلاڑی کسی بھی پیس کو چھوئے بغیر دوسری جگہ منتقل کر سکتے ہیں۔
شطرنج کئی دہائیوں سے ڈیجیٹل گیم کی صورت میں دستیاب ہے لیکن اس کے کھلاڑی جانتے ہیں کہ شطرنج کو اچھی کوالٹی کے بورڈ پر کھیلنے کا اپنا ہی مزہ ہے۔

اگر دونوں کھلاڑی ایک دوسرے سے ہزاروں میل دور ہوں تو ان کا شطرنج کے فیزیکل بورڈ پر کھیلنا نا ممکن لگتا ہے لیکن اب ایسا ممکن ہو گیا ہے۔سکوائر آف میں کھلاڑی دور رہتے ہوئے بھی ایک دوسرے سے، انٹرنیٹ یا موبائل ایپ کے ذریعے کھیل سکتےہیں۔موبائل فون یا انٹرنیٹ پر کھیلی جانے والی چال کو سکوائر آف ، شطرنج کے نیچے چھوٹے روبوٹک بازؤ سے دہرائے گا اور بورڈ پر حقیقی پیس کو دوسرے خانوں میں منتقل کرے گا۔

(جاری ہے)

یہی چیز آپ کے مخالف کے شطرنج کے بورڈ کے ساتھ ہوگی۔
سکوائر آف کو chess.com سے بھی کنکٹ کیا جا سکتا ہے جہاں 24 ملین شطرنج کے کھلاڑی موجود ہیں۔ صارفین ان میں سے کسی کو بھی کھیلنے کے لیے مدعو کر سکتے ہیں۔اس کے علاوہ صارفین سکوائر آف کی مصنوعی ذہانت سے بھی کھیل سکتے ہیں۔یہ مصنوعی ذہانت مشکلات کے 20 لیول پیش کرتی ہے۔رپورٹ کے مطابق سکوائر آف کی ایلو ریٹنگ 3380 کے برابر ہے جبکہ انسانوں میں سب سے زیادہ ایلو ریٹنگ میگنس کارلسن کی ہے۔ اُن کی ریٹنگ 2886 ہے۔
سکوائر آف کنگڈم سیٹ کی قیمت 369 ڈالر ہے جبکہ بڑے سیٹ کی قیمت 445 ڈالر ہے۔