الگ الگ گھروں میں دو مختلف ناموں سے زندگی گزارنے والی انوکھی بلی

امین اکبر منگل 3 دسمبر 2019 23:39

میکسیکو سے تعلق رکھنے والے ایک خاندان کو حال ہی میں معلوم ہوا ہے کہ اُن کا پالتو بلا دوہری زندگی گزار رہا ہے۔ یعنی یہ بلا ایک دوسرے نام سے چند بلاک دور ایک دوسرے گھر کا بھی پالتو بلا ہے۔

عام طور پر بلیاں آزاد رہتی ہیں۔اسی وجہ سے جب پکسی نامی بلا اپنے گھر سے غائب ہونا شروع ہوا تو اس کی مالکن میری یہی سمجھا کہ وہ میکسیکو میں تاماولیپاس شہر کی گلیوں میں پرندوں کا پیچھا کرتا پھر رہاہوگا۔

پکسی کی مالکن تصور بھی نہیں کر سکتی تھیں وہ پکسی کی اکلوتی مالک نہیں بلکہ پکسی چند بلاک دور ایک دوسرے خاندان کا پالتو بلا بھی ہے۔پکسی کی دوہری زندگی کا راز پچھلے ماہ ہی افشاء ہوا ہے۔ پکسی پچھلے ماہ اپنے گھر آیا تو اس نے گردن کے نیچے نیا کالر پہنا ہوا تھا۔

(جاری ہے)

ایک فیس بک پوسٹ میں پکسی کی مالکن میری نے بتایا کہ کس طرح انہوں نے پکسی کی دوہری زندگی کا پتا چلایا۔

انہوں نے بتایا کہ نیا کالر دیکھ کر انہیں اندازہ ہوگیا تھا کہ کوئی دوسرا خاندان بھی پکسی کا خیال رکھتا ہے۔ انہوں نے کاغذ پر ایک پیغام لکھ کر کالر میں ڈال دیا۔اس کے بعد وہ انتظار کرنے لگیں کہ کب پکسی دوبارہ غائب ہوتا ہے۔

میری نے کاغذ میں لکھا ”اس کا نام پکسی ہے، میرا خیال ہے کہ اس کے دو گھر ہیں ھاھا“ ۔غائب ہونے کے بعد پکسی دوبارہ آیا تو اس کے کالر میں ایک دوسرا کاغذ تھا،جس پر دوسرے مالک نے لکھا تھا کہ ” یہاں اس کا نام شیارائی ہے، بظاہر اس کے دو گھر ہیں، آداب “

پچھلے ایک ماہ سے پکسی / شیارائی دونوں گھروں کے درمیان خط و کتابت کا کام کر رہا تھا، جو بظاہر ایک ہی علاقے میں رہتے ہیں۔

دونوں خاندان مشترکہ طور پر بلے کو پالتے رہے اور آپس میں خطوط کا تبادلہ کرتے رہے۔

اس بلے کی دوہری زندگی گزارنے کی خبر پچھلے ماہ سوشل میڈیا پر وائرل ہوئی تھی۔ میری لورا بارا نے اپنے بلے اور لکھے ہوئے خطوط کی تصاویر فیس بک پر شیئر کی تھیں، جو وائرل ہو گئیں۔