اپوزیشن لیڈر شہباز شریف نے ناصر محمود کھوسہ، اخلاق احمد تارڑ اور عرفان قادر کے نام وزیراعظم کو غور کے لئے بھجوادئیے

پیر 20 جنوری 2020 20:10

اسلام آباد (اُردو پوائنٹ اخبارتازہ ترین - این این آئی۔ 20 جنوری2020ء) پاکستان مسلم لیگ (ن) کے صدر اور قائد حزب اختلاف شہبازشریف نے وزیراعظم عمران خان کو خط لکھ کر چیف الیکشن کمشنر کے لئے تین نام وزیراعظم کو بھجوادئیے ۔ پیر کو اپوزیشن لیڈر نے ناصر محمود کھوسہ، اخلاق احمد تارڑ اور عرفان قادر کے نام وزیراعظم کو غور کے لئے بھجوادئیے۔ اپوزیشن لیڈر نے اپنے خط میں کہاکہ آپ کے بھجوائے گئے پینل پر غور جاری ہے، اس اثناء آپ میرے بھجوائے ناموں پر غور کریں۔

(جاری ہے)

اپوزیشن لیڈر نے 15 جنوری 2020 کو وزیراعظم کے لکھے گئے خط کا جواب بھجوایا ہے ۔ شہباز شریف نے کہاکہ افسوس ہے کہ میں نے 25نومبر2019ء کو جس عمل کا آغاز کیاتھا اس میں غیرضروری اور بلاجواز تاخیر کی گئی۔ شہبازشریف نے کہاکہ یہ عمل شروع کرنا آرٹیکل 213 ٹواے کے تحت میری آئینی ذمہ داری تھی، غیرضروری تاخیر کی وجہ سے اب تک اتفاق رائے حاصل نہیں ہوپایا۔ انہوںنے کہاکہ غور جیسے ہی مکمل ہو، ہمیں سپریم کورٹ کے فیصلے کی روح کے مطابق عمل کرنا چاہئے۔