ظلم کا خاتمہ جدوجہد کے بغیر ممکن نہیں، حافظ محمد ادریس

لاہور (اُردو پوائنٹ اخبارتازہ ترین - آن لائن۔ 22 جنوری2020ء) جماعت اسلامی کے رہنما حافظ محمد ادریس نے منصورہ میں کارکنان کی تربیتی ورکشاپ سے خطاب کرتے ہوئے کہاہے کہ ظلم کا خاتمہ جدوجہد کے بغیر ممکن نہیں ۔ حق اور باطل ہمیشہ سے ایک دوسرے کے مد مقابل رہے ہیں ۔ حضرت آدم ؑ کی تخلیق کے وقت ہی شیطان نے اللہ سے بغاوت کی اور اولاد آدم ؑ کے خلاف تاقیامت اعلان جنگ کردیا ۔

انہوںنے کہاکہ حق کا ساتھ دینا ہر بندہٴ مومن کا فر ض ہے ۔ ہمارے رسول پاک صلی اللہ علیہ وسلم نے حق کا پرچم بلند کیا تو ساری دنیا دشمن تھی مگر 23 سال کے عرصے میں پانسہ پلٹ گیا ، حق غالب آیا اور باطل مٹ گیا ۔ انہوںنے کہاکہ کوئی کلمہ گو جھوٹ اور ظلم کا ساتھ دینے لگے تو اس سے بڑا کوئی المیہ نہیں ہوتا ۔ آج امت مسلمہ کے مظلومین کشمیر و ہند اور غزہ و فلسطین میں یہود ہنود کے مظالم کا شکار ہیں جبکہ مصر ،شام، بنگلہ دیش میں نام نہاد مسلمان حکمرانوں نے ظلم کی انتہا کردی ہے ۔

(جاری ہے)

خود پاکستان ، جو اسلام کے نام پر بنا اور جس کی طرف پوری امت مسلمہ امید کی نظروں سے دیکھتی ہے ، ظلم سے بھر گیاہے ۔ جس کی لاٹھی اس کی بھینس کا تباہ کن اصول لاگو ہے ۔ غریب کی آہ بھی ظلم ڈھانے والوں اور اقتدار کے نشے میں بدمست طبقوں کو سخت ناگوا ر گزرتی ہے ۔ ایسے عالم میں سید مودودی کا ایمان افروز بیانیہ کہ’’ قرآن و سنت کی دعوت لے کر اٹھو اور ساری دنیا پر چھا جائو‘‘ہی مشکلات سے نکلنے کا راستہ دکھا سکتاہے ۔ قرآن و سنت کا نظام پاکستان میں آ جائے تو مسلمان پھر دنیا کی قیادت کر سکتے ہیں ۔