خوشاب،ڈی سی کی پرائس کنٹرول مجسٹریٹس کو بے جا مہنگائی وگرانفروشی پر قابو پانے کے لئے مزید اقدامات کرنے کی ہدایت

خوشاب (اُردو پوائنٹ اخبارتازہ ترین - اے پی پی۔ 18 فروری2020ء) ڈپٹی کمشنر خوشاب مسرت جبیں نے پرائس کنٹرول مجسٹریٹس کو ہدایت کی ہے کہ ضلع میں بے جا مہنگائی اورگرانفروشی پر قابو پانے کے لئے مزید اقدامات کئے جائیں اس سلسلے میں دکانداروں کو طے شدہ نرخوں کی وصولی کا پابند بنایا جائے۔ ڈپٹی کمشنرنے اپنے آفس میں پرائس کنٹرول مجسٹریٹس کی کارکردگی کے جائزے کیلئے منعقدہ اجلاس سے بات چیت کرتے ہوئے مزید کہا کہ مصنوعی قلت، ذخیرہ اندوزی اور ملاوٹ کرنے والوں کا سختی سے محاسبہ کریں۔

(جاری ہے)

انہوں نے غلہ منڈی اور منڈیوں کے آڑھتیوں و تاجروں سے قریبی روابط رکھنے کی ہدایت کی اور کہا کہ سبزیوں،پھلوں اور کریانہ کی اشیاء کی طلب کے مطابق سپلائی کو یقینی بنایا جائے۔ ڈپٹی کمشنر نے کہا کہ شہریوں کو ریلیف فراہم کرنے کے لئے ناجائز منافع خوروں سے کوئی رعایت نہیں ہونی چاہیے اور جو دکان دار بار بار خلاف ورزی کرے اس کو پابند سلاسل کیا جائے۔ اجلاس میں ایڈیشنل ڈپٹی کمشنر ریونیو عدیل حیدر، اسسٹنٹ کمشنر خوشاب راشد اقبال، اسسٹنٹ کمشنر نورپور تھل محمدسیف، اسسٹنٹ کمشنر نوشہرہ عمران نصیر، سسٹم نیٹ ورک ایڈمنسٹریٹر خوشاب اسرار احمد و دیگر افسران موجود تھے۔