کوئی نہیں جانتا کہ پوری کاؤنٹی کو بدبو دار کرنے والی یہ بو کہاں سے آرہی ہے

امین اکبر ہفتہ 29 فروری 2020 23:55

پچھلے سال کے آخر سے اب تک ڈیلاویر کاؤنٹی، پنسلوینیا میں ایک سخت ناگوار بد بو آتی ہے اور ختم ہو جاتی ہے۔ ایسا وقفے وقفے سےہورہا ہے۔ کوئی نہیں جانتا کہ سلفر کی طرح یہ بد بو کہاں سے آ رہی ہے۔
اکتوبر 2019ء میں آسٹن، پنسلوینیا کے لوگوں نے حکام کو ایک ناگوار بدبو کی شکایت کی۔نومبر میں ریڈلے ٹاؤن شپ کے رہائشیوں نے حکام کو بدبو کے بارے میں مطلع کیا۔

دسمبر میں بروک ہیون کے لوگوں نے ہنگامی نمبروں پر کال کر کے بدبو کے بارے میں بتایا۔جنوری میں بھی بہت سے ٹاؤن شپس نے حکام کو اس بدبو کے بارے میں بتایا۔پچھلے ہفتے یہ بدبو گلینولڈن میں رپورٹ ہوئی۔ ماہرین ابھی تک اس کے ماخذ کا پتا چلانے میں ناکام رہے ہیں۔ لوگوں کا کہنا ہے کہ یہ بد بو پیٹرولیم اور سلفر جیسی ہے۔یہ بدبو ڈیلاویر کاؤنٹی کے 200 مربع میل کے علاقے میں اچانک آتی ہے اور پھر غائب ہو جاتی ہے۔

(جاری ہے)

حکام اپنی تحقیقات میں پتا چلانے کی کوشش کرر ہے ہیں کہ یہ بدبو ایک دم کیسے آ کر غائب ہو جاتی ہے۔جب یہ آتی ہے تو بہت مختصر وقت کے لیے ہوتی ہے۔حکام کا کہنا ہے کہ انہیں جیسے ہی کوئی بدبو کی رپورٹ کرتا ہے یہ غائب ہو چکی ہوتی ہے۔
ڈیلاوئیر کاؤنٹی کے علاقے سے بہت سی گیس اور تیل کی پائپ لائنیں گزرتی ہیں۔ حکام کا کہنا ہے کہ کسی ایک جگہ سے پائپ لائن لیک ہو تو اس کی بدبو پوری کاؤنٹی میں نہیں پھیل سکتی۔کئی ماہ گزرنے کے باوجود حکام ابھی تک اس بدبو کا ماخذ تلاش کرنے کی کوشش کر رہے ہیں۔