مریم اورنگزیب نے وزیراعظم عمران خان کے خطاب کو مایوس کن قرار دے دیا

اسلام آباد (اُردو پوائنٹ اخبارتازہ ترین - این این آئی۔ 30 مارچ2020ء) پاکستان مسلم لیگ(ن)کی ترجمان مریم اورنگزیب نے وزیراعظم عمران خان کے خطاب کو مایوس کن قرار دے دیا ۔اپنے ردعمل میں ترجمان مسلم لیگ (ن) مریم اورنگزیب نے کہا کہ یہ کنفوز وزیراعظم کی کنفیوڑن سے بھرپور تقریر تھی ۔انہوں نے کہا کہ تقریرثبوت ہے عمران صاحب کے پاس قوم کو بچانے کی کوئی حکمت عملی نہیں،پہلے ڈیم کے نام پر فول بنایاگیا ، اب ٹائگر فورس کے نام پر ڈیم فول بنایاجارہا ہے ۔

انہوں نے کہا کہ حکومت کے پاس نہ گیس، نہ بجلی، نہ راشن اور نہ کسی عوامی ریلیف کی کوئی حکمت عملی ہے ،ریلیف فنڈ میں عام آدمی کے لئے کوئی ریلیف نہیں ۔انہوں نے کہا کہ عمران صاحب کورونا پر تو سیاست نہ کریں،عمران صاحب وزیراعظم کی کرسی پر بیٹھ کر کس سے کہہ رہے ہیں لاک ڈاون ٹھیک نہیں ۔

(جاری ہے)

مریم اورنگزیب نے کہا کہ عوام حیران اور پریشان ہیں کہ وزیراعظم لاک ڈاون نہیں چاہتے تو پھر لاک ڈاون کیسے ہوا ،عمران صاحب آج بتاتے کہ تافتان کی تباہی کا ذمہ دار وزیر صحت عمران صاحب ہیں ،آج بتاتے کہ ڈاکٹرز، نرسز اور طبی عملے کو حفاظتی کٹس دینے کے لئے کیا بندوبست ہے ،آج بتاتے کہ کورونا مفت ٹیسٹنگ کے لئے کیا حکمت عملی ہے ،آج بتاتے کہ دیہاڑی دار مزدوروں اورکمزور، نادار طبقے کے لئے کیا ریلیف ہی ،بتاتے کہ بجلی اور گیس کے بلوں میں کیا ریلیف دیاجارہا ہی ،بتاتے کہ کورنٹین سینٹرز کے قیام کے لئے کیا حکمت ہے ،آج قوم کو بتاتے کہ ان کی جان بچانے کے لئے کتنے وینٹیلیٹرز آگئے ہیں ۔

انہوں نے کہا کہ مہربانی کرکے آئندہ خطاب نہ کریں تو قوم کو بہت بڑا ریلیف مل جائے گا۔افسوس کے ساتھ کہنا پڑرہا ہے کہ ریلیف فنڈ پی ٹی آئی اپنے حلقوں میں سیاست کے لئے استعمال کررہی ہے،عمران صاحب کا یہ اقدام بہت خطرناک ثابت ہوگا، عوام میں افراتفری اور جرائم میں اضافہ ہوگا ۔انہوں نے کہا کہ حکومت پاکستان کے فنڈز کو پی ٹی آئی ریلیف فنڈ بنا کر تقسیم کیاجارہا ہے ،عمران صاحب قوم کو بتاتے کہ ریلیف فنڈ کے وسائل کو کس طرح مختص اور تقسیم کیاجارہا ہے ۔انہوں نے کہاکہ پی ٹی آئی یوتھ ونگ کو ٹائیگرفورس کا نام دے دیا گیا ہے ،وزیراعظم کے پلان میں سرکاری مشینری اور بیوروکریسی غائب ہے ،ریلیف فنڈ کی نگرانی اور تقسیم کے لئے فوری طورپر پارلیمنٹری کمیٹی بنائی جائے۔