عوام اور پولیس مل کر وفاقی دارالحکومت میں کورونا وائرس کو شکست دیں گے،ڈی آئی جی آپریشن اسلام آباد وقار الدین سیّد

منگل 31 مارچ 2020 20:02

اسلام آباد ۔ (اُردو پوائنٹ اخبارتازہ ترین - اے پی پی۔ 31 مارچ2020ء) ڈی آئی جی آپریشن اسلام آباد پولیس وقار الدین سیّد نے کہا ہے کہ عوام اور پولیس مل کر وفاقی دارالحکومت میں کورونا وائرس کو شکست دیں گے، پولیس عوام کے شانہ بشانہ کھڑی ہے۔ ان خیالات کا اظہار انہوں نے منگل کو ایس پی انڈسٹریل ایریا شیخ زبیر اور ان کی ٹیم کی طرف سے سے شہریوں کو کورونا وائرس سے محفوظ رہنے کیلئے سماجی فاصلوں سے متعلق عملی حکمت عملیوں سے آگاہی مہم کے موقع پرکیا۔

(جاری ہے)

انہوں نے کہا کہ وفاقی پولیس نے کورونا سے جنگ کے موقع پر یہ نعرہ اختیار کیا ہے کہ کورونا سے لڑنا ہے اس سے ڈرنا نہیں، اسی لئے اسلام آباد پولیس کورونا کی وبا سے نمٹنے کیلئے شہریوں کے شانہ بشانہ کھڑی ہے، انشاء اللہ ہم سب مل کر اس وباء کو ختم کریں گے۔ انہوں نے کہا کہ آپریشنز ڈویژن سے ٹیمیں ضلع بھر میں شہریوں کو آگاہی فراہم کر رہی ہیں۔ شہریوں سے درخواست ہے کہ وہ غیر ضروری نقل و حرکت سے گریز کریں، تمام شہری کورونا وائرس سے بچائو کے متعلق ہدایات پر عمل کریں۔