شہریوں کو خوفزدہ کر کے گھروں میں روکنے کے لیے یوکرین کے شہر میں حکام نے سینکڑوں قبریں کھود دیں

امین اکبر اتوار 12 اپریل 2020 23:54

یوکرین کے شہر دنیپرو میں حکام نے کووڈ-19 سے نپٹنے کے لیے شہر میں 600 قبریں کھود دیں۔ دلچسپ بات یہ ہے کہ اس وقت تک شہر میں اس بیماری سے کوئی بھی فوت نہیں ہوا جبکہ اس کے رجسٹرڈ کیسوں کی تعداد بھی صرف 13 ہے۔
اس شہر کی آبادی 10 لاکھ سے زیادہ افراد پر مشتمل ہے۔ اس شہر کے میئر نے لوگوں کو اس بیماری کی سنگینی کا احساس دلانے کے لیے انوکھا قدم اٹھایا ۔

پچھلے ہفتے میئر بورس فیلاٹوف نے اپنی فیس بک پوسٹ میں لکھا کہ مقامی حکام بدترین صورت حال کی تیاری کر رہے ہیں۔ انہوں نے مزید لکھا کہ متوقع اموات کی وجہ سے انہوں نے 600 نئی قبریں بھی کھود لیں ہیں۔
انہوں نے لکھا ” ہم بدترین کے لیے تیاری کر رہے ہیں۔ 400 نہیں، 600 قبریں شہر کے قبرستانوں میں کھودی جا چکی ہیںاکہ کورونا وائرس سے وفات پانے والوں کی تدفین کو ممکن بنایا جا سکے۔

(جاری ہے)

لاشوں کو محفوظ کرنے کے لیے 1000 موٹے پلاسٹک کے بیگز بھی خرید لیے گئے ہیں“۔
دنیپرو کے میئر کی ترجمان یولیا وٹویٹسکا نے اے ایف پی سے بات کرتے ہوئے شہر میں کووڈ-19 سے وفات پانے والوں کے لیے 615 قبریں اور 2000 باڈی بیگز کی تیاری کا حکم دیا گیا ہے۔میئر نے بتایا کہ انہوں نے طبی عملے کو کورونا وائرس انفیکشن سے وفات پانے والوں کی لاش کا طبی معائنہ کرنے سے منع کر دیا ہے۔

شہریوں کو خوفزدہ کرنے کے لیے لیے مقامی حکام کے بیانات ہی کافی تھے لیکن انہوں نے سینکڑوں تازہ کھودی ہوئی قبروں کی تصاویر بھی شیئر کرنا شروع کر دی ۔
مقامی حکومت کے اس اقدام پر صارفین نے ملے جلے رد عمل عمل کا اظہار کیا ہے۔ کچھ صارفین کا کہنا ہے کہ میئر فیلاٹوف نے بیماری سے پریشان لوگوں میں مزید خوف و ہراس پھیلایا ہے جبکہ کچھ افراد اس طرح کا طریقہ استعمال کرنے پر میئر کو سراہا رہے ہیں۔
میئر فیلاٹوف اپنے بیانات اور اقدامات پر بالکل نادم نہیں ۔ انہوں نے کہا ” یہ خوف و ہراس نہیں بلکہ انتظام ہے۔ خدا نہ کرے کہ ہمیں قبروں اور باڈی بیگز کی ضرورت پڑے۔“