بھارتی تاجروں نے ملائیشین پام آئل کی خریداری دوبارہ شروع کردی، 2 لاکھ ٹن آئل کے سودے طے

بدھ 20 مئی 2020 12:55

ممبئی (اُردو پوائنٹ اخبارتازہ ترین - اے پی پی۔ 20 مئی2020ء) بھارتی تاجروں نے سفارتی کشیدگی سے معطل ملائیشین پام آئل کی خریداری دوبارہ شروع کردی جس کی وجہ ملکی سٹاک کم ہونا اور لاک ڈائون کے باعث بین الاقوامی منڈی میں خوردنی تیل کی رعایتی نرخوں دستیابی ہے۔کاروباری ذرائع کے مطابق ملائیشیا کی نئی حکومت کے قیام کے بعد دونوں ملکوں کے تعلقات میں بہتری آئی ہے اورگزشتہ ہفتے ملائیشین حکام نے 1 لاکھ ٹن بھارتی چاول خریدنے کے ایک معاہدے پر دستخط کیے ۔

(جاری ہے)

ادھر بھارتی تاجروں نے بھی ملائیشیا سے 2 لاکھ ٹن خام پام آئل کی خریداری کا معاہدہ کیا ہے جس کی سپلائی جون اور جولائی میں کی جائے گی۔ملائیشین و انڈونیشین پام آئل کا کاروبار کرنے والے سنگاپور کے ایک تاجر نے بتایا کہ بھارت میں پام آئل کے پورٹ سٹاک میں تیزی سے کمی واقع ہوئی ہے،رواں سال پہلے 4 ماہ کے دوران پام آئل کی درآمد 2019 ء کے اسی عرصے کے مقابلے میں 50 فیصد سے زیادہ کم ہوکر 1.11 ملین ٹن رہی۔ان کا کہنا تھا کہ بھارت دنیا بھر میں خوردنی تیل کا سب سے بڑا درآمد کنندہ ہے اور اس کی حالیہ خریداری سے پام آئل کے نرخوں میں بہتری آئی ہے۔