پی آئی اے طیارہ حادثہ، گلوکار زوہیب حسن بھی بال بال بچ گئے

حادثے کا شکار ہونے والی پرواز کیلئے ٹکٹ بک تھا، تاہم 2 روز قبل ہی کراچی آ گئے تھے

محمد علی ہفتہ 23 مئی 2020 00:15

پی آئی اے طیارہ حادثہ، گلوکار زوہیب حسن بھی بال بال بچ گئے

کراچی (اردوپوائنٹ اخبارتازہ ترین۔22 مئی 2020ء) گلوکار زوہیب حسن بھی بال بال بچ گئے، حادثے کا شکار ہونے والی پرواز کیلئے ٹکٹ بک تھا، کچھ وقت قبل ہی اپنا پلان تبدیل کیا۔ تفصیلات کے مطابق کراچی میں حادثے کا شکار ہو جانے والا پی آئی اے کا طیارہ جہاں کئی لوگوں کی زندگیاں نگل گیا، وہیں کچھ خوش قسمت لوگ موت کے منہ میں جانے سے بال بال بچ گئے، بتایا گیا ہے کہ حادثے کے دوران طیارے میں سوار 3 مسافر معجزانہ طور پر زندہ بچ گئے۔

جبکہ پی آئی اے کے اس طیارے میں جس ائیرہوسٹس کو کراچی جانا تھا، وہ بھی طیارے میں سوار نہ ہوئی اور یوں اس کی جان بچ گئی۔ جبکہ اب گلوکار زوہب حسن نے بتایا ہے کہ انہیں بھی پی آئی اے کی اسی پرواز کے ذریعے کراچی جانا تھا، تاہم ان کا پلان تبدیل ہونے کے باعث وہ اس پرواز کے ذریعے کراچی نہیں گئے، اور یوں ان کی زندگی بچ گئی۔

(جاری ہے)

زوہب حسن کا بتانا ہے کہ حال ہی میں ان کے والد کا انتقال ہوا اور ان کی نماز جنازہ 21 تاریخ کو ادا کی جانا تھی۔

وہ لندن میں موجود تھے اور وہاں سے ہنگامی طور پر بڑی مشکل سے پاکستان واپس آنے میں کامیاب ہوئے۔ وہ برطانیہ سے لاہور پہنچے تھے اور انہیں دیگر مسافروں کیساتھ 72 گھنٹے کیلئے قرنطینہ کر دیا گیا تھا۔ ان کے والد کی نماز جنازہ کراچی میں تھی، جبکہ ان کیلئے فلائٹ 22 مئی کو شیڈول تھی، جس میں ان کیلئے ٹکٹ بھی بک کروایا دیا گیا تھا۔ تاہم پھر انہوں نے کوشش کر کے اجازت طلب کی اور 2 روز قبل ہی کراچی پہنچ گئے تھے۔

اگر تو انہیں اجازت نہ ملتی، تو وہ بھی آج لاہور سے کراچی جانے والی پی آئی اے کی پرواز میں موجود ہوتے۔ واضح رہے کہ لاہور سے کراچی جانے والے پی آئی اے کی پرواز کے حادثے میں 2 پاکستانی ماڈلز بھی جاں بحق ہوئی ہیں۔ زارا عابد اور اسرا چوہدری لاہور سے کراچی جانے والے طیارے میں سوار تھیں۔