جون کے آخر اور جولائی میں کورونا عروج پر ہوگا، شبلی فراز

کورونا وائرس کے ہاٹ اسپاٹ کو ڈھونڈ کر اسمارٹ لاک ڈائون کا فیصلہ کرتے ہیں، صوبے کئی معاملات میں خود مختار ہیں، وفاقی وزیر

منگل 23 جون 2020 14:07

جون کے آخر اور جولائی میں کورونا عروج پر ہوگا، شبلی فراز

اسلام آباد (اُردو پوائنٹ اخبارتازہ ترین - این این آئی۔ 23 جون2020ء) وفاقی وزیر اطلاعات سینیٹر شبلی فراز نے کہا ہے کہ پاکستان میں جون کے آخر اور جولائی میں کورونا وائرس عروج پر ہوگا۔جاری کیے گئے ایک بیان میں وفاقی وزیرِ اطلاعات سینیٹر شبلی فراز نے کہا کہ کورونا وائرس کی صورتِ حال کو دیکھتے ہوئے فیصلے کیے جاتے ہیں۔انہوں نے کہا کہ کورونا وائرس کے ہاٹ اسپاٹ کو ڈھونڈ کر اسمارٹ لاک ڈائون کا فیصلہ کرتے ہیں، صوبے کئی معاملات میں خود مختار ہیں۔

(جاری ہے)

وزیرِ اطلاعات شبلی فراز نے کہا کہ سندھ حکومت این سی او سی میں فیصلوں کو قبول کرتی ہے، جبکہ ان فیصلوں پر بعد میں سیاست شروع کر دیتی ہے۔انہوں نے کہا کہ سندھ حکومت اس کورونا وائرس کی وباء میں بھی سیاست کر رہی ہے، وزیرِ اعلیٰ سندھ مراد علی شاہ ہمیشہ کنفیوژن پھیلاتے ہیں۔وفاقی وزیرِ اطلاعات شبلی فراز کا کہنا ہے کہ وزیرِ اعلیٰ سندھ مراد علی شاہ این سی او سی میں کچھ اور باہر کچھ اور بات کرتے ہیں۔ان کا کہنا ہے کہ وزیرِ اعظم عمران خان نے وزیرِ اعظم ہائوس کے اخراجات بھی کم کیے ہیں، کورونا وائرس کی ایس او پیز پر عمل کرنا قوم کا فرض ہے۔