سینیٹ ہاؤس کے نام سے نئے سگریٹ کے پیکٹس سینیٹرز میں تقسیم

سینٹ کے مونوگرام کے ساتھ سگریٹ کے پیکٹس تقسیم ہونے پر متعدد سینٹرز کا برہمی کا اظہار

جمعہ 24 جولائی 2020 23:05

اسلام آباد (اُردو پوائنٹ اخبارتازہ ترین - این این آئی۔ 24 جولائی2020ء) سینیٹ کے مونوگرام کے ساتھ چھپے نئے سگریٹ پیکٹس سامنے آگئے ، پارلیمنٹ ہاؤس میں سگریٹ نوشی ممنوع ہونے کے باوجود 'سینیٹ ہاؤس' کے نام سے سگریٹ تقسیم کیے گئے،سینیٹر دلاور خان نے ارکان سینیٹ کو سگریٹ کے پیکٹس تحفے میں دئیے۔سینٹ کے مونوگرام کے ساتھ سگریٹ کے پیکٹس تقسیم ہونے پر متعدد سینٹرز نے برہمی کا اظہار کیا۔

(جاری ہے)

نجی ٹی وی کے مطابق ارکان سینیٹ نے اس عمل کی مذمت کرتے ہوئے اسے باعث تشویش قرار دیا اور کہا کہ کیا سینیٹ کے نام کے ساتھ سگریٹ کا برینڈ متعارف کرانا قانونی ہی سینیٹ کے مونوگرام کو سگریٹ کے ڈبے پر چھاپنے کی اجازت نہیں دی جا سکتی تاہم سینیٹر میاں عتیق کا کہنا تھا کہ پارلیمنٹ کی عمارت کے اندر سگریٹ نوشی کی اجازت نہیں، لیکن اگر کسی نے ذاتی حیثیت میں کسی کو تحفہ دیا ہے تو یہ اس کا حق ہے۔انہوں نے کہا کہ مجھے ابھی تک سگریٹ کا ڈبہ نہیں ملا نہ ہی میں سگریٹ نوشی کرتا ہوں، لیکن ممکن ہے کہ تحفہ میرے گھر بھی آجائے۔سینیٹر دلاور خان نے معاملے پر موقف دینے سے اجتناب کیا، ذرائع کا کہنا ہے کہ سینٹیر دلاور خان کی مردان میں سگریٹ کی فیکٹری ہے۔