Live Updates

تونس کی پارلیمنٹ میں امارات، اسرائیل معاہدے کیخلاف مذمتی قرارداد منظور

تونس کی حکومت ، پارلیمنٹ اور عوام سمیت تمام طبقات فلسطینی قوم کے ساتھ کھڑے ہیں،قراردادکامتن

بدھ 19 اگست 2020 14:29

تونس کی پارلیمنٹ میں امارات، اسرائیل معاہدے کیخلاف مذمتی قرارداد منظور

تونس (اُردو پوائنٹ اخبارتازہ ترین - این این آئی۔ 19 اگست2020ء) افریقی عرب ملک تونس کی پارلیمنٹ میں متحدہ عرب امارات کے اسرائیل کے ساتھ تعلقات کے قیام کے اعلان کیخلاف متفقہ طور پر ایک قرارداد منظور کی گئی ہے۔ اس قرارداد میں خلیجی ریاست کی اسرائیل کے ساتھ دوستی کے اعلان کی شدید مذمت کی گئی ہے۔

(جاری ہے)

مرکزاطلاعات فلسطین کے مطابق تونسی پارلیمان میں منظور ہونے والی قرارداد میں کہا گیا کہ امارات اور اسرائیل کے درمیان معاہدہ فلسطینی قوم کے اصولی مطالبات اور بنیادی حقوق کے ساتھ کھلی نا انصافی، عرب اور عالم اسلام کے اجتماعی موقف سے انحراف اور انسانی حقوق کی بدترین خلاف ورزی ہے۔

قرارداد میں کہا گیا ہے کہ تونس کی حکومت ، پارلیمنٹ اور عوام سمیت تمام طبقات فلسطینی قوم کے ساتھ کھڑے ہیں۔ تونس کسی صورت میں قضیہ فلسطین کو نظرانداز کرنے اور فلسطین میں اسرائیل کے استعماری صہیونی منصوبوں کو تحفظ دینے کی حمایت نہیں کرے گا۔قرارداد میں کہا گیا ہے کہ خلیجی ریاست نے اسرائیل کے ساتھ دوستی کا اعلان کرکے کروڑوں مسلمانوں کے جذبات کو ٹھیس پہنچائی ہے۔ اس اقدام سے صہیونی ریاست کو قبلہ اول پر غاصبانہ قبضے، فلسطین میں توسیع پسندی اور فلسطینی علاقوں میں آبادی کاتوازن تبدیل کرنے کی سازشوں میں مدد ملے گی۔