وزیرریلوے کا ڈیرہ اسماعیل خان میں کامیاب آپریشن پر سکیورٹی فورسز کو خراج تحسین

جمعرات 9 اکتوبر 2025 17:45

اسلام آباد (اُردو پوائنٹ اخبارتازہ ترین - این این آئی۔ 09 اکتوبر2025ء) وفاقی وزیر ریلوے محمد حنیف عباسی نے ڈیرہ اسماعیل خان میں سکیورٹی فورسز کے کامیاب آپریشن پر فورسز کو زبردست خراج تحسین پیش کیا ہے۔جمعرات کو یہاں جاری ایک بیان میں وفاقی وزیر ریلوے نے کہا کہ سکیورٹی فورسز نے بھارتی حمایت یافتہ فتنہ الخوارج کے خلاف بڑی اور کامیاب کارروائی کی جس کے دوران بہادر جوانوں نے سات دہشت گردوں کو جہنم واصل کر دیا۔

(جاری ہے)

محمد حنیف عباسی نے کہا کہ قوم اپنے بہادر سپاہیوں کو سلام پیش کرتی ہے جن کی قربانیاں دہشت گردی کے مکمل خاتمے کے لیے ناقابل فراموش ہیں۔ انہوں نے کہا کہ میجر سبطین حیدر نے بہادری سے لڑتے ہوئے جام شہادت نوش کیا ، وہ قوم کے ہیرو ہیں، ان کی قربانی ہمیشہ یاد رکھی جائے گی۔وفاقی وزیر نے کہا کہ سکیورٹی فورسز کا حوصلہ بلند ہے اور آخری دہشت گرد کے خاتمے تک جدوجہد جاری رہے گی۔ انہوں نے کہا کہ خطرات کے باوجود ہمارے جوانوں کا جذبہ اور عزم غیر متزلزل ہے۔