سانحہ کارساز کا درد ہمارے سینوں میں ہمیشہ زندہ رہے گا، سینیٹر رحمان ملک

زندگی کو لاحق خطرات، دھمکیاں اور بم دھماکے شہید محترمہ بینظیر بھٹو کو اپنے کارکنوں سے دور نہ کر سکے، بیان

اتوار 18 اکتوبر 2020 13:30

اسلام آباد(اُردو پوائنٹ اخبارتازہ ترین - این این آئی۔ 18 اکتوبر2020ء) پاکستان پیپلز پارٹی کے سینیٹر رحمان ملک نے شہدائے کارساز کو زبردست خراج تحسین پیش کرتے ہوئے کہا ہے کہ سانحہ کارساز کا درد ہمارے سینوں میں ہمیشہ زندہ رہے گا۔ اپنے بیان میں سینیٹر رحمن ملک نے کہاکہ سانحہ کارساز کے بہادر شہیدوں اور انکے اہل و عیال کو سلام پیش کرتا ہوں، 18 اکتوبر پاکستانی تاریخ کا ایک پر درد اور پر غم دن ہے۔

(جاری ہے)

انہوںنے کہاکہ سانحہ کارساز کا درد ہمارے سینوں میں ہمیشہ زندہ رہے گا، کارساز میں ساتھیوں کے گرے ہوئے پامال لاشوں کا پرآشوب منظر آج بھی آنکھوں میں ہے۔ انہوںنے کہاکہ ظلم، ستم اور گرے ہوئی لاشیں محترمہ بینظیر بھٹو شہید و بہادر جیالوں کے حوصلے پست نہیں کر سکا۔ سینیٹر رحمان ملک نے کہاکہ زندگی کو لاحق خطرات، دھمکیاں اور بم دھماکے شہید محترمہ بینظیر بھٹو کو اپنے کارکنوں سے دور نہ کر سکے۔ انہوںنے کہاکہ ملکی سالمیت اور جمہوریت کے استحکام کیلئے پی پی پی کی قربانی بے مثل و بینظیر ہیں، آج کے دن ملک و انسانیت کے دشمن طالبان ظالمان نے پاک سرزمین کو انسانیت کے خون میں نہلایا تھا۔